Փաստ ինֆո

ԱԺ պատգամավոր Հովիկ Աղազարյանի՝ մանդատը դնելու մասին վարչապետի խնդրանքը մերժելուց հետո տարբեր պաշտոնյաներ կանչել են նրան, սպառնացել, որ հեռախոսային խոսակցությունները, նամակագրությունները կարող են հայտնվել մամուլում, նրա ընտանիքի անդամների մոտ, ինչին արձագանքելով՝ Աղազարյանն ասել է՝ չի հրաժարվելու, ինչ ուզում են՝ թող անեն։ Այնուհատեև, նույն փաթեթը հայտնվել էր Նիկոլ Փաշինյանի սեղանին։ Ընդ որում, դա տեղի է ունեցել Արգիշտի Քյարամյանի և Հովիկ Աղազարյանի վերաբերյալ գործով Աղազարյանի հեռախոսն առգրավվելուց հետո։

Փաստաբան Հակոբ Ճարոյանը «Փաստինֆո»-ի հետ զրույցում հայտնեց, որ փաստաբանական հարցում է կատարել ՀԿԿ քննիչին՝ փորձելով պարզել, թե ում հանձնարարությունն է կատարվել, բացի այդ, պատրաստվում է նաև հանցագործության մասին հաղորդում ներկայացնել։

Ինչ վերաբերում է ՀԿԿ-ում քննվող՝ մանր եղջերավոր կենդանիների արտահանման ընթացքում հովանավորչության և ենթադրյալ կաշառքի վերաբերյալ գործին, ապա փաստաբանը պնդում է՝ բավականաչափ տվյալներ կան հիմնավորելու, որ Հովիկ Աղազարյանի գլխին սարքել են, ինչի մասին են վկայում նաև մեկ այլ գործով ստացված գաղտնալսման արդյունքները։ Այդ դրվագով՝ հանցագործության մասին հաղորդում ներկայացնող անձ, ըստ փաստաբանի, չկա։

Մեկ այլ գործ՝ կապված Աղազարյանի որդու հետ, փաստաբանը պնդում է՝ մինչ իր որդու՝ ավտոմեքենաների ներկրման վերաբերյալ գործի հարուցումը, Աղազարյանը բազմիցս փորձել է Քյարամյանից և Բադասյանից պարզել, թե ինչ հիմքով են նման գործեր հարուցվում, նա այդ հարցով զբաղվել է շատ ավելի շուտ՝ առնվազն դրանից մեկ տարի առաջ։ Այդ գործով քննիչն արգելանք է դրել մեքենաների վրա, դատարանը, սակայն, չի բավարարել արգելանքը, ինչի վերաբերյալ փաստը քննիչը թաքցրել է ընկերությունից։

Բացի այդ, ևս մեկ քրեական գործ կա՝ ներգրավված ավտոմեքենայում թմրանյութի հայտնաբերման վերաբերյալ, որով վարույթ չէր նախաձեռնվել, քանի որ նշվել էր՝ չնչին չափի թմրանյութ է եղել, քրեորեն պատժելի չէր։ Այժմ այդ գործը ևս փորձում են վերակենդանացնել՝ ըստ փաստաբանի։

«Թե որքանով դատախազը կդիմի՝ անձեռնմխելիությունից զրկելու համար, որքանով կկալանավորեն՝ ինքը պատրաստ է դրան։ Որքանո՞վ կլինի հիմնավոր՝ հիմնավոր չի լինի»,- ասաց փաստաբանը։ Նա նաև նշեց, որ Հովիկ Աղազարյանը պետք է ավելի վատին պատրաստ լինի՝ տարբեր օրեր, տարբեր խոսակցություններ կարող են տարածվել՝ ինչ-որ ֆեյք էջով։

Մանրամասները՝ տեսանյութում։

Հեղինակ՝ Իզաբել Սահակյան

Աղբյուր` Փաստինֆո