Փաստ ինֆո

Ազգային ժողովի նախագահ Ալեն Սիմոնյանը բացասական է վերաբերվում ՔՊ-ական պատգամավոր Հովիկ Աղազարյանի այն քայլին, որ չլսեց Փաշինյանին ու մանդատը վայր չդրեց։

«Հայաստանի վարչապետը նրան հրապարակայնորեն խնդրանքով է դիմել ու, չեմ կարծում, որ նման պարագայում ճիշտ է այդ խնդրանքը մերժելը»,- լրագրողների հետ զրույցում ասել է Սիմոնյանը։

Ինչ վերաբերում է Հովիկ Աղազարյանի հետ հանդիպմանը, ապա նա վստահեցրեց՝ Աղազարյանին չի սպառնացել։ Նրա խոսքով՝ անկեղծ զրույց է եղել, խոսել են, էմոցիոնալ խոսք է եղել, չի քննարկել որևէ հարց, որևէ պատճառ, քննարկել է հարցը, որ կա նման խնդրանք, որը, իր կարծիքով, պետք է բավարարվի։

«Եթե ես որևէ մեկին սպառնում եմ, դա անում եմ տեսախցիկների առաջ»,- ասաց Սիմոնյանը։
Նա նաև հայտարարեց, որ Աղազարյանին պետք է հեռացնել ՔՊ խմբակցությունից։

«Եթե պարոն Աղազարյանն իրեն թիմից դուրս է դնում, ապա ինքը թիմի հետ այլևս ճանապարհ չունի շարունակելու»։

Հարցին՝ խմբակցությունից կհեռացնե՞ք՝ Սիմոնյանն արձագանքեց. «Իհարկե»:
«Արժեքային համակարգ է, մեր թիմն է, եթե դու թիմից դուրս ես քեզ դնում, ամենավատ բանն է, ես չգիտեմ վարչությունն այսօր ինչ որոշում կկայացնի, բայց ես կարծում եմ՝ եթե նման բան տեղի ունենա, դա ուղղակի ստեղծված իրավիճակի արձանագրում է, այլ ոչ թե նոր իրավիճակի ստեղծում»,- նշեց Սիմոնյանը։

Աղբյուր` Փաստինֆո