Փաստ ինֆո

Գյումրիում փրայմերիզի գործընթացն ամբողջությամբ կազմակերպում է ՔՊ վարչությունը, որևէ գյումրեցի ներգրավված չէ այս գործընթացի մեջ՝ անաչառություն ապահովելու համար։ Այս մասին ԱԺ-ում լրագրողների հետ զրույցում նշեց ԱԺ ՔՊ խմբակցության պատգամավոր Դավիթ Առուշանյանը՝ անդրադառնալով Գյումրիի քաղաքապետի պաշտոնակատար նշանակելու համար նախնական ընտրություններ անցկացնելուն:

Նա ընդգծեց, որ վարչապետը վաղն է հրապարակվելու այն մարդկանց անունները, ովքեր են մասնակցելու են նախնական ընտրություններին:

Առուշանյանը նաև նշեց, որ տեղյակ չէ, թե էլ ովքեր են ինքնաառաջադրվել, քանի որ միայն ՔՊ-ականները չեն մասնակցում, այլ նաեւ համակիրները, համախոները, որոնք պատրաստ են ՔՊ-ի անունից հանդես գալ որպես թեկնածու:

Անդրադառնալով իր՝ որպես թեկնածու ժամանակավոր պաշտոնակատար նշանակվելու շանսերին, նա պատասխանեց, որ գյումրեցին է տալու այդ մանդատը։ «Գյումրին սպեցիֆիկ քաղաք է, Գյումրին կամ շատ սիրում է, կամ չի ընդունում: Շատ բարդ է հասկանալ, թե դու որ սեգմենտի մեջ ես:

Փրայմերիզը ցույց կտա, որ գյումրեցիները իրենք կորոշեն, թե ում են տեսնում որպես քաղաքի ժամանակավոր պաշտոնակատար»:

Դիտարկմանը, որ ինքնաառաջադրվել է նաև Աննա Հակոբյանի ազգական Վահագն Մկրտչյանը և նրա շանսերն ավելի մեծ են, Առուշանյանը պատասխանեց, որ փրայմենրիզը լինելու է խիստ անաչառ ու խիստ վերահսկելի: «Լրատվականները փորձում են շահարկել պարոն Մկրտչյանի ազգակցական կապերի հետ կապված, կարող եմ ասել, որ այս պարագայում որևէ ազդեցություն չի ունենալու, եթե պարոն Մկրտչյանն ունի լայն համախոհություն գյումրեցիների կողմից, ուրեմն ինքն էլ ընտրվելու է: Որևէ մեկը չի կարող կանխատեսել, խոսակցությունները, թե նախնական պլանավորած, որոշած է, չեն համապատասխանում իրականությանը»:

Աղբյուր` Փաստինֆո