Փաստ ինֆո

Չեմ բացառում, որ Գլխավոր դատախազը կարող է ինձ անձեռնմխելիությունից զրկելու ու կալանավորելու հարցով մտնել ԱԺ։ Այս մասին 24News-ին տված հարցազրույցում ասել է ՔՊ-ական պատգամավոր Հովիկ Աղազարյանը։

Նա հայտնել է, որ ԱԺ-ում Արգիշտի Քյարամյանի հետ տեղի ունեցած միջադեպի առիթով նախաձեռնված է քրեական վարույթ։ «Քրեական վարույթ է նախաձեռնված նաև մանր եղջերավոր անասունների արտահանման հետ կապված գործով, որտեղ ես ներգրավված եմ որպես վկա»։

Նա նշել է, որ ինքը որևէ գործող որպես մեղադրյալ ներգրավված չէ։ «Այս պահին գոյություն ունի տխրահռչակ ոչխարների գործը, գոյություն ունի պարոն Քյարամյանի հետ կապված միջադեպի գործը։ Եվս մի գործ կա տղայիս մասնակցությամբ ընկերության հետ կապված վարույթը՝ մեքենաների ներմուծման հետ կապված։ Ընդ որում՝ այդ մեքենաների հետ կապված խնդիր չի եղել, առաջին մեքենան 4 օր է եղել կայանքի տակ, խնդիրը հարթված է։

Եվս մեկ գործ կա, որի կրակը վառ են պահում։ Այդ ընկերությունը, որը աճուրդով մեքենա է ձեռք բերել ԱՄՆ-ից, մեքենաներից մեկի մեջ նարկոտիկանման փոքր քանակությամբ նյութ է հայտնաբերվել, այս գործը փակված չէ։ Հիշեցնում են դրա մասին։

Այսինքն, 4 գործ կա»,-ասաց նա՝ չբացառելով, որ Գլխավոր դատախազը այս որոշումից հետո կմտնի խորհրդարան իրեն անձեռնմխելիությունից զրկելու հարցով։

Հիշեցնենք, որ Աղազարյանը քիչ առաջ հայտարարել է, որի չի պատրաստվում վայր դնել մանդատը։

Աղբյուր` Փաստինֆո