Փաստ ինֆո

Հակակոռուպցիոն դատարանում` դատավոր Տիգրան Դավթյանի նախագահությամբ շարունակվում է ՀՀ ՔԿ նախկին նախագահ, ՀՀ նախկին գլխավոր դատախազ Աղվան Հովսեփյանի գործով դատաքննությունը:

Ինչպես հայտնել ենք՝ վերջին նիստում՝ երեկ, հարցաքննվել է տուժողի կարգավիճակ ունեցող Վարշամ Ղարիբյանի` Շանթի Յուրայի եղբայրը` գործարար Մանվել Ղարիբյանը, որն ամբողջությամբ հերքեց եղբոր ցուցմունքները: Նախ` վկան պատմեց, որ Երևան ՀԸ բաժնետոմսերը ձեռք բերելու համար Վարշամ Ղարիբյանը որևէ գումար չի տվել, իսկ ամխիթար վիճակում գտնվող ՀԸ-ն ձեռք է բերվել բացառապես Նիգ-Ապարան հայրենակցական կազմակերպության համար` կազմակերպության որոշմամբ:

Հաջորդիվ, ի հայտ եկան նոր հանգամանքներ ևս: Պարզվում է` նախաքննության ընթացքում վկա Մանվել Ղարիբյանը հարցաքննվել է մեկ անգամ, սակայն նրա հարցաքննությունը կիսատ է մնացել, չի շարունակվել, իսկ քննիչը խեղաթյուրել էր նրա նախաքննական ցուցմունքը: Վկան պատմեց, որ ցուցմունք տալուց հետո, երբ պատրաստվում էր ստորագրել ցուցմունքի տակ, իր փաստաբանը կարդացել է այն, ապա` նկատել ցուցմունքի արձանագրության և տրված ցուցմունքի անհամապատասխանությունը, ինչից հետո շտկում է իրականացվել, ապա` նոր միայն վկան ստորագրել է այն: Ղարիբյանը նշեց` նախաքննության ընթացքում էլ կտար այն ցուցմունքը, ինչը տվել է դատարանում։ Նկատենք, որ դատարանում տված ցուցմունքն ամբողջությամբ հերքում էր նախաքննական մարմնի մեղադրանքները։

Պարզվեց՝ Մանվել Ղարիբյանը ժամանակին առաջարկել է Աղվան Հովսեփյանին համատեղ բիզնեսով զբաղվել, սակայն վերջինս հրաժարվել է՝ նշելով, որ ինքը բիզնեսից հեռու է, ժամանակ էլ չունի:

Ինչ վերաբերում է գործարար Արշավիր Սարգսյանի` ցուցմունքում տված պնդումներին, թե Աղվան Հովսեփյանն իր բիզնես-պարտնյորն է եղել, Մանվել Ղարիբյանը նշեց` եթե Հովսեփյանն իր հետ բիզնես-պարտնյոր չէ, չի կարող որևէ այլ անձի բիզնես-պարտնյորը լինել, եթե իր նման բիզնեսմենի հետ «փայ չի մտել», ապա կզարմանար, եթե Արշավիրի հետ աշխատեր:

Մանվել Ղարիբյանը կասկածի տակ դրեց նաև եղբոր պնդումներն առ այն, թե իբրև հողատարքծը ձեռք է բերել` աճուրդով` թերթում տեսնելով հայտարարությունը, որ 12.6 հա հող է վաճառվում:

«Դուք հավատում ե՞ք: Վարշամն ասում է, որ թերթում տեսել է` 12.6 հա հղ է վաճառվում, ինքն էլ աճուրդին մասնակցել է ու գնել։ Դուք հավատո՞ւմ եք դրան»,- դիմելով հանրային մեղադրողին ասել է վկան ու ավելացրել, որ ինքը չի հավատում, քանի որ ինքն է վճարել։

Վկայի հարցաքննությունը դեռ չի ավարտվել։ Մեղադրող Կորյուն Սերոբյանը նշեց, որ ունի հարցեր և միջնորդությունները, ըստ այդմ, Ղարիբյանի հարցաքննությունը կշարունակվի դեկտեմբերի 17-ին նշանակված նիստին: Մինչ դատական նիստը կավարտվեր` Աղվան Հովսեփյանը հայտարարությամբ հանդես եկավ` նշելով, որ նախաքննությունն իրականացվել է ոչ օբյեկտիվ, ոչ լիարժեք:

«Ես իմ ամբողջ 45 տարի դատախազական և քննչական մարմիններում աշխատած ժամանակ չեմ հիշում մի գործ անգամ, որ վկային կիսատ հարցաքննեն նախաքննության ընթացքում, հետո չկանչեն հարցաքննության ու դատակոչեն` կիսատ հարցաքննությամբ: Նման բան ես չեմ հիշում»,- նշեց Հովսեփյանը` հավելելով, որ ակնհայտ է, որ նախաքննական մարմինը չի շարունակել հարցաքննությունը, որովհետև իրենց ոչ ձեռնտու ցուցմունք էր տրվում: Հովսեփյանը նկատեց` ամեն դատական նիստին ի հայտ են գալիս` ոչ լրիվ, ոչ օբյեկտիվ նախաքննություն իրականացնելու հանգամանքները, ապա, հրավիրելով դատախազի ուշադրությունն այդ հանգամանքին, Հովսեփյանը նշեց` իր աչքի առաջ է դա տեղի ունեցել: Սերոբյանն էլ հայտարարեց` վկան երեք անգամ փաստաբանի ներկայությամբ հարցաքննվել է, ինչին հակադարձեց փաստաբան Աննա Մանթաշյանը` նշելով, որ վկան հենց այսօրվա նիստին ասաց, որ հենց փաստաբանն է արձանագրել, որ իր ցուցմունքը փոփոխվել է և չի ստորագրել:

Հեղինակ` Իզաբել Սահակյան

Աղբյուր` Փաստինֆո