Փաստ ինֆո

«Հիմա մեկ հարց ենք քննարկում, ավելի խճճվել ու ավելի շատ հարցեր են առաջացել, քան պատասխաններ»,- Արցախից բռնի տեղահանվածների՝ ՀՀ քաղաքացիության ձեռքբերման հարցերի վերաբերյալ ԱԺ-ոմւ այսօր տեղի ունեցած քննարկման ժամանակ ասել է Արցախի Հանրապետության ԱԺ «Ազատ հայրենիք-ՔՄԴ» խմբակցության պատգամավոր Աշոտ Դանիելյանը՝ հրապարակավ առաջարկելով ՀՀ ԱԺ նախագահ Ալեն Սիմոնյանին՝ միջխորհրդարանական նիստ հրավիրել Հայաստանի և Արցախի ԱԺ-ների միջև՝ լուծումներ գտնելու համար։

«Պարոն Ղազարյան, ՀՀ անձնագրով եւ Արցախում էին բարձր պաշտոններ զբաղեցնում , և ՀՀ-ում։ Մեկ գիշերվա ընթացքում, որոշում եք կայացրել, որ քաղաքացի չեն և 6 ամսից ավելի արցախցիները անձնագրայիններում էին։ Դուք պետք է տեսնեիք այդ հերթերը՝ 10 ամիս բլոկադայի հերթերից հետո»,- նշել է Դանիելյանը։

Նա նշեց, որ կարելի էր միջանկյալ լուծում տալ, այն է՝ 070 կոդը ճանաչվեր, մինչև անձնագրի ժամկետի լրանալը, հետո կփոխվեր անձնագրի կոդը, երբ այն ժամկետանց կդառնար։ Արցախցի պատգամավորն արձանագրեց, որ արցախցիների համար բավական վիրավորական է, երբ ՀՀ պաշտոնյաներն այնպես են խոսում կարծես ՀՀ պաշտպանության տակ գտնվելը հավաստող փախստականի փաստաթղթի մասին խոսվում է, ընդ որում՝ այն տոնով, կարծես արցախցիները շնորհակալ պետք է լինեին, որ դա արվել է։

«Սոմալիի՞ց էինք եկել , որ արդարանում եք նման կերպ, թե շնորհակալություն պետք է հայտնեինք, բա պետք է արվեր դա» , - ասաց Դանիելյանը։

ՆԳՆ նորանշանակ փոխնախարարն արձագանքեց, թե դա նկատի չուներ , երբ նշում էր այդ փաստաթղթի տրամադրման մասին, պարզապես նկատի ուներ, որ Միգրացիայի ծառայության աշխատակիցներն էլ, որպես բռնի տեղահանվածներին ընդունող աշխատակիցներ, աշխատել են առանց շնորհակալության ակնկալիքի։ Ապրել են մեր հայրենակիցների հետ իրենց ցավն ու դա ոչ թե լարվածության աղբյուր պետք է լինի, այլ ապրումակցման»։

Աղբյուր` Փաստինֆո