Փաստ ինֆո

«Ես նախկին զինվորական եմ, կոչում ունեմ։ Զինված ուժերի մասին օրենքն ասում է՝ ՀՀ Զինված ուժերում իրավունք ունեն ծառայել բացառապես ՀՀ քաղաքացիները։ Ես ուզում եմ իմանալ՝ ես որտեղի՞ քաղաքացի եմ եւ եթե ծառայել եմ, վիրավորվել եմ, հանուն ինչի՞ եմ ծառայել ու վիրավորվել եւ ո՞ւմ հրամանով է ինձ շնորհվել մայորի կոչում»։ ԱԺ-ում Արցախից բռնի տեղահանվածների՝ ՀՀ քաղաքացիության ձեռքբերման հարցերի վերաբերյալ քննարկման ժամանակ ՆԳ փոխնախարար Արմեն Ղազարյանին հարց ուղղեց Արցախի Ազգային ժողովի «Դաշնակցություն» խմբակցության ղեկավար Արթուր Մոսիյանը։

Ի պատասխան՝ Արմեն Ղազարյանը նշեց, որ Արթուր Մոսիյանի քաղաքացիության մասին տեղեկություն չունի։ «Պետք է Ձեր անհատական տվյալներն ստուգենք տվյալների բազաներով, որպեսզի կարողանամ դրա մասին ինֆորմացիա հայտնել»։ Մոսիյանն ասաց, որ ունեցել է 070 կոդով անձնագիր եւ մինչեւ 2023 թվականն էլ հաշվառված է եղել Արցախի Հանրապետությունում։ «Տրամաբանորեն Լեռնային Ղարաբաղի բնակիչ եք, ով ներկայումս գտնվում է Հայաստանի ժամանակավոր պաշտպանության տակ։ Զինծառայության մասով չեմ կարող մեկնաբանություններ անել, պարոն Մոսիյան, իրավասու չեմ»,- արձագանքեց Արմեն Ղազարյանը։

«Պարոն Ղազարյան, ես այս շենք մտել եմ՝ ցույց տալով ՀՀ նույնականացման քարտը, որը ես ստացել եմ 2022 թվականին։ Խնդրում եմ, պարզաբանում կտա՞ք, ինչպես եմ ստացել այդ փաստաթուղթը»,- Արմեն Ղազարյանին դիմեց Արցախի մարդու իրավունքների պաշտպան Գեղամ Ստեփանյանը։

Փոխնախարարն էլ պարզաբանեց․ «Ինչպես ստացել եք 070 կոդով անձնագիրը, որը ՀՀ քաղաքացու ձեւանմուշի է, նույն տրամաբանությամբ ստացել եք նույնականացման քարտը»։ «Բայց ՀՀ նույնականացման քարտի մասին որոշումը կամ օրենքը, հիմա լավ չեմ հիշում, նշում է, որ միայն ՀՀ քաղաքացիներին է տրվում այդ փաստաթուղթը»,- արձագանքեց Գեղամ Ստեփանյանը։

Աղբյուր` Փաստինֆո