Փաստ ինֆո

Նոր Հաճնի կամուրջը շարունակում է փակ մնալ, թեեւ, ի սկզբանե, հայտարարվել էր, որ հիմնանորոգման աշխատանքները կավարտվեն հոկտեմբերի 6-ին։ Համենայն դեպս, «Ճանապարհային դեպարտամենտ» հիմնադրամը այդպես էր վստահեցրել. «Հիմնանորոգման աշխատանքներով պայմանավորված՝ օգոստոսի 20-ից մինչև հոկտեմբերի 6-ը կդադարեցվի երթևեկությունը Հ-6, /Հ-2/-Նոր Գեղի-Եղվարդի տրանսպորտային հանգույց-/Մ-1/ ավտոճանապարհի Հրազդան գետի վրայի կամրջով (Նոր Հաճնի կամուրջ)»,- նշված էր օգոստոսի 19-ին տարածված հայտարարության մեջ։

Հետո նոր հաղորդագրությամբ հայտարարվեց աշխատանքներն ավելի քան մեկ ամսով երկարաձգելու մասին՝ վերջնաժամկետ սահմանելով նոյեմբերի 12-ը։ Սակայն նոյեմբերն արդեն ավարտվում է, իսկ կամուրջը, որը կարեւոր ենթակառուցվածք է մայրաքաղաքի Նոր Հաճնի ու հարակից բնակավայրերի կապն ապահովելու համար, չի գործում։
Որպես այլընտրանք առաջարկված երթուցիները խիստ անհարմար են, առանց գիշերային լուսավորության։ Բնակիչները մտահոգված են, տեղումներ սկսվելուց հետո ընդհանրապես բարդ կլինի Երեւան հասնելը ու ստիպված են լինելու մի քանի անգամ երկարացնել ճանապարհը ու Երեւան հասնել Չարենցավանի մոտով։

«Փորձում էինք Արզնու ձորով Երևան գալ, սակայն այնպիսի խցանում էր առաջացել, որ ստիպված եղանք հետ գնալ ու փորձել Չարենցավանի կողմով պտտվել»,- «Փաստինֆո»-ին ասաց Արգել համայնքի բնակիչուհին՝ նշելով, որ երեկոյան ժամերին վտանգավոր է Արզնու ձորի ճանապարհը։ «Տեսե՛ք, Գետամեջի մոտով՝ Արզնու ձորով, առաջարկում են մտնել և անցնել դեպի Երևան, բայց այս ճանապարհը ձորի ճանապարհ է ու բացի այն, որ ձմեռային սառած ճանապարհի հետ գործ ունենք, նաև ավելանում է մութը, ընդհանրապես լուսավորություն չունի, բավական նեղ է ու այդ ամենը պատճառ է դառնում, որ խցանում լինի ու բավական վտանգավոր», - նկարագրեց մեր զրուցակիցը։ Նրա փոխանցմամբ, եթե նախկինում 25 րոպե էր տեւում Երեւան հասնելը, ապա այսօր 1,5 ժամ, ինչի պատճառով նաեւ աշխատանքից են ուշանում։

Կամրջի հիմնանորոգման աշխատանքների ձգձգման պատճառների ու նոր վերջնաժամկետի մասին պաշտոնական պարզաբանում չի հրապարակվել։ Փոխարենը հայտարարություն տարածվեց առ այն, որ նորանշանակ ՏԿԵ նախարար Դավիթ Խուդաթյանը, պաշտոնը ստանձնելուց հետո, նոյեմբերի 23-ին գնացել և ծանոթացել է տվյալ կամրջի շինարարական աշխատանքներին։ «Փաստինֆո»-ի հարցին, թե, ի վերջո, երբ է նախատեսված Նոր-Հաճնի կամրջի հիմնանորոգման աշխատանաքների ավարտը՝ ՀՀ Տարածքային և ենթակառուցվածքների նախարարության մամլո խոսնակ Սոնա Հարությունյանը պատասխանեց, որ աշխատանքները մեծ թափով ընթանում են, որպեսզի մինչև տարեվերջ կամուրջը պատրաստ լինի։ Մեր դիտարկմանը, որ բնակիչներից ահազանգ ունենք, որ նորանշանակ նախարարի գալու օրը շինարարներ են եղել, նկարվել են, իսկ նրա գնալուց հետո գործ չի արվում՝ Հարությունյանը նշեց, թե « նման բան չկա, պարզապես ձյուն է եղել երկու օր, հիմա աշխատանքը շարունակվում է»։

Նախարարի այցի ժամանակ շինարարը վստահեցրել էր, որ մասնավորապես ջրամեկուսացման և ներքին շերտի տեղադրման շինաշխատանքներն արդեն ավարտական փուլում են: Շուտով կսկսվի ասֆալտբետոնի վերին շերտի տեղադրումը:

Իսկ քանի որ, ըստ օդերեւութաբանների, հզոր ցիկլոն է ներթափանցել ու հանրապետությունում սպասվում են տեղումներ, հետեւապես բացառված չէ, ավելին՝ շատ հավանական, որ աշխատանքները նորից կընդհատվեն։ Կամ էլ՝ ասֆալտբետոնի վերին շերտը կտեղադրեն ձնախառը, ձյան ու անձրեւի տակ կիրականացնեն ասֆալտապատում ու հետո էլ կհայտարարեն որակյալ ասֆալտապատման մասին ու ոչինչ, որ գարնանը նորից գումար դուրս կգրեն փոսերն ու ճաքերը կարկատելու համար։

Աղբյուր` Փաստինֆո