Փաստ ինֆո

«Այն, ինչ տեղի է ունենում Սիրիայում, մի քանի երկրի կողմից ճնշման փորձ է, որպեսզի Սիրիան հրաժարվի իր քաղաքական կուրսից», - «Փաստինֆո»-ին ասաց, Սիրիայի խորհրդարանում հայ համայնքի պատգամավոր Մարիա Գաբրիելյանը։

Նրա փոխանցմամբ՝ Հալեպի եւ Իդլիբի շրջաններում գտնվող ԱԼ ՆՈՒՍՐԱ ահաբեկչական խմբավորումը երկու օր առաջ լայնածավալ հարձակում է սկսել մի քանի գյուղերի ու գյուղաքաղաքների, զինվորական կենտրոնների վրա՝ օգտարգործելով ծանր ու միջին զինամթերք։ Պատգամավորի գնահատմամբ՝ այդպիսով ոտնահարվել է հիշյալ շրջանների ռազմական լարվածությունը մեղմացնելուն ուղղված համաձայնությունը։ Գաբրիելյանն ասաց, որ սիրիական բանակը դիմադրել է , անգամ անցնել հակահարձակման, սակայն Հալեպում տեղի ունեցողն, ըստ պատգամավորի, Իսրայելի, Թուրքիայի, Ֆրանսայի եւ ԱՄՆ-ի միջեւ համագործակցության հետեւանք է։

«Այն ուղղված է այդ պետության վրա ճնշում գործադրելուն, որպեսզի Սիրիան փոխի քաղաքական կեցվածքը։ Սիրիայի իշխանությունները շարունակում են մնալ այն սկզբունքին, որ առաջնահերթ է Սիրիայի տարածքային ամբողջականության վերականգումն ու սեփական հողերի նկատմամբ վերահսկողության վերականգնումը»,- նշեց հայազգի պատգամավորը՝ ավելացնելով, որ մեր զրույցի պահին դեռևս մարտական թեժ գործողությունները շարունակվում են։

Ավելի վաղ ՀՀ ԱԳՆ -ն տեղեկացրել էր, որ Սիրայի Հանրապետությունում տուժածների թվում հայեր չկան։

Աղբյուր` Փաստինֆո