Փաստ ինֆո

Կարեն Սարուխանյանը Գյումրիի քաղաքապետի թեկնածուների համար հայտարարաված փրայմերիզի ֆոնին հանդես է եկել առակով, որն առաջարկում է քաղաքականացնել։

ՔՊ-ական պատգամավորը, ով նաև ՀՀ երկրորդ քաղաքի քաղաքապետի նախկին թեկնածուն է, ֆեյսբուքյան իր էջում մեջբերել է Վիլյամ Սարոյանի առակը։

Նա մասնավորապես գրել է.

«Երեկոյան, քնից արթնանալով, առյուծն սկսում է մռնչալ՝ արթնացնելով անտառի հեռու ծայրերում քնած կենդանիներին: Արթնանում է նաև մի նապաստակ, որ տեսնելով մյուս կենդանիներին փախչելիս ու թաքնվելիս, ասում է.
-Ինչո՞ւ պիտի առյուծն այդպես ահարկու մռնչա, և բոլորը փախչեն ու թաքնվեն; Ինչ է, չե՞մ կարող ես էլ նրա պես մռնչալ, որ մեծից փոքր սրտաճաք լինեն վախից։
Եվ նապաստակը թոքերը պատռելով փորձում է առյուծի պես մռնչալ, բայց ողորմելի ճվճվոց է դուրս գալիս: Հենց այդ պահին մի սոված աղվես է անցնելիս լինում։ Լսելով նապաստակի ճվճվոցը, նա գալիս է, ճանկում մեծամիտի գլուխը և ասում.
-Սրանից հետո լավ հիշիր՝ դու նապաստակ ես ու ոչ թե առյուծ:
Ասում է և ուտում հիմար նապաստակին»:

Հիշեցնենք, որ Սարուխանյանի Գյումրիի քաղաքապետի պաշտոնում թեկնածության մասին հայտարարությամբ հանդես եկավ ԱԺ նախագահ Ալեն Սիմոնյանը։ Ավելի ուշ մամուլում հրախարակումներ եղան այն մասին, որ Նիկոլ Փաշինյանը Սարուխանյանից պահանջել է արյան մեջ թմրանյութերի առկայության մասին թեստ հանձնել, ու թեստը դրական է եղել։ Ավելի ուշ Սարուխանյանը հրապարակել է թեստի արդյունքները, չնայած դրան՝ Նիկոլ Փաշինյանը հայտարարեց Գյումրիում ՔՊ թեկնածուի փրայերիզ անցկացնելու մասին։

Նշենք, որ Գյումրիի համայնքապետի պաշտոնին մերձքպական շրջանակներից հավակնում են նաև Հայաստանի տնտեսագիտական համալսարանի Գյումրու մասնաճյուղի տնօրեն Կարեն Պետրոսյանը, ով ըստ մամուլի՝ վարչապետի աշխատակազմի ղեկավար Արայիկ Հարությունյանի մտերիմն է։ Իշխանական մյուս թեկնածուն վարչապետի տիկնոջ՝ Աննա Հակոբյանի բարեկամ Վահագն Մկրտչյանն է․ նախկինում Գյումրիի փոխքաղաքապետի պաշտոնն է զբաղեցրել։
Ի դեպ՝ Սարուխանյանը նախօրեին հայտնել էր, որ իր դեմ արշավն իրականացնում են այսպես կոչված՝ մյուս «քաղաքապետացուները»։

Մնում է միայն գուշակել, թե ներկայացված առակում, ով է ըստ Սարուխանյանի նապաստակը, ով աղվեսը։

Աղբյուր` Փաստինֆո