Փաստ ինֆո

Կառավարության այսօրվա նիստում Փաշինյանը բողոքեց, թե ստիպված է եղել քայլել ժավելների, քսայուղերի, տարաների արանքներով՝ պատմելով նախորդ շաբաթ ՀՀ բնակավայրերից մեկում իր զբոսանքի մասին։

«Մայթերին ուղղակի շարած էին, ստիպված էինք լեռնային դահուկներին հատուկ ութաձև քայլերով գնալ»,- ասաց Փաշինյանն՝ ընդգծելով, որ սա դեռ ամենը չէ։

Նա անդրադարձավ նաեւ «Լվա ինքդ» ծառայությանը, որտեղ քաղաքացիները կարողանում են իրենց մեքենաները լվանալ։
«Շատ լավ է, բայց այդ մեքենաները լվանալու համար օգտագործում են բավականին ժամանակակից գործիքներ, որոնք ջրի շատ էական շիթ են արձակում, իմ դիտարկումները ցույց էին տալիս, այդ օրն էլ համոզվեցի, որ շատ դեպքերում «Լվա ինքդ» օբյեկտները տեղակայված են մայթի եզրին, երբ որ մեքենայի չորս կողմը պտտվում ենք ջրի շիթերով, ակնհայտ է, որ ջրի շիթերը դուրս են գալիս դեպի մայթ։ Իմ բախտը բերեց, որոշ մարդիկ նկատեցին, ասացին՝ «մի րոպե, մի պզզցրեք, վարչապետն ա անցնում»։

Իհարկե, զգացված եմ խիստ հարգալից վերաբերմունքի համար, բայց հարց է ծագում՝ եթե այդ մայթով վարչապետը չի քայլում, ինչու պետք է քաղաքացին հեռվից նկատի, որ ջրի շատ ուժեղ շիթ է արձակվում դեպի փողոց»,- նշեց Փաշինյանը ու հանձնարարեց տեսչական մարմիններին հատ-հատ ստուգեն այդ խնդիրը։

Աղբյուր` Փաստինֆո