Փաստ ինֆո

Այն, որ COP29-ը ինքնին կայացել է Ադրբեջանում՝ գրավելով բավականին մեծ միջազգային ուշադրություն՝ բավականին հաջողություն է Ադրբեջանի համար։ Պետք է հիշել, որ այդ հաջողությունը հնարավոր է դարձել բացառապես Հայաստանի շնորհիվ, որ անցյալ տարի դեկտեմբեր ամսին ՀՀ փաստացի կառավարությունը իր վետոն չդրեց և համաձայնվեց, որ այդ միջոցառումը տեղի ունենա Բաքվում, ընդ որում, չստանալով հնարավոր ամենամեծ զիջումները։ «ՓաստԻնֆոյի» եթերում ասել է թյուրքագետ, պ․գ․թ․, դոցենտ Վարուժան Գեղամյանը։

Բանախոսի դիտարկմամբ, այս միջոցառումը ցույց տվեց, որ Ադրբեջանը կարող է ունենալ միջին ուժի կարգավիճակ, որը գերտերություն չէ, բայց իր ունեցած քաղաքական, ռազմական ու տնտեսական ռեսուրսներով կարողանում է ազդել միջազգային օրակարգի վրա։ Առաջիկա տարիներին, ցավոք սրտի մեզ համար, Ադրբեջանը շարունակելու է այդ կերպարի և դերի մեջ հանդես գալ՝ մեզ համար հնարավոր հետևանքներով։

Թյուրքագետը նշում է, որ Ադրբեջանը չկարողացավ այն մեծ ծավալի հակահայկական օրակարգը մտցնել COP29-ի շրջանակներում, որը նախատեսում էր։ Դրա համար մի շարք պատճառներ կան․ հակահայկական օրակարգը լիարժեք չի մտնում միջազգային օրակարգում, կամ չունի աջակցություն։ Կարևոր հանգամանք է հայկական, հատկապես սփյուռքյան լոբբիստական կազմակերպությունների հետևողական աշխատանքը, որի շնորհիվ բազմաթիվ մարդիկ չմասնակցեցին, իսկ բազմաթիվ պատվիրակություններ էլ ոչ ամբողջական կազմով մասնակցեցին այդ միջոցառմանը։ Խոշոր հաշվով միջազգային կազմակերպությունները արեցին այն գործը, որը պետք է աներ ՀՀ ԱԳՆ-ն։

Անդրադառնալով COP29-ին հայկական կողմի բացակայությանը, փորձագետը նշեց, որ հիմնական պատճառը հասարակական հնարավոր զայրույթն ու պոռթկումն էր, որը կարող էր լինել անկախ այն բոլոր քարոզչական փորձերը, որոնք արվում էին վերջին տարիներին՝ Ադրբեջանի հետ հարաբերությունները ներկայացնելու համար։ Ինչքան էլ որ ՀՀ դե ֆակտո իշխանությունները ցանկանում էին այնտեղ գնալ, հավանաբար եղել է գնահատում՝ հնարավոր հանրային դժգոհության։

«Դե ֆակտո իշխանությունը երեք հիմնասյուն ունի՝ արտաքին աջակցությունը, ոստիկանական ուժերը և հանրային չեզոքությունը։ Հաշվի առնելով որ առաջիկայում իշխանությունները նպատակ ունեն հանրային աջակցության գործողություններ իրականացնել՝ կարևորում են երրորդ հիմնասյունը»,- ասել է Վ․ Գեղամյանը։

Մանրամասները՝ տեսանյութում։

Աղբյուր` Փաստինֆո