Փաստ ինֆո

2018թ․ «Իմ քայլը» դաշինքի ցուցակով պագամավորի թեկնածու եղած դատավոր Սարգիս Պետրոսյանը ինքնաբացարկ չհայտնեց ՀՀ երկրորդ նախագահ Ռոբերտ Քոչարյանի և մյուսների գործով, պնդում է՝ քաղաքականությամբ չի զբաղվում։

«Չեմ զբաղվել, քաղաքական պաշտոն զբաղեցնելու հայտ եմ ներկայացրել»,-ասաց Սարգիս Պետրոսյանը, ինչին արձագանքելով՝ Ռոբերտ Քոչարյանը նշեց, որ դա նշանակում է քաղաքականությամբ զբաղվել, ՔՊ կուսակցության անդամ է եղել։ Դատավորն էլ նշեց՝ չի հերքում, որ կուսակցության անդամ է եղել։

Հաջորդիվ, քննարկվել է մեղադրողներին բացարկ ներկայացնելու հարցը։ Ռոբերտ Քոչարյանը, մինչ դատախազներին անդրադառնալը, նախ անդրադարձավ նախագահողին, նշեց՝ բոլորին ուշադրությամբ լսում էր, տպավորություն է՝ ոչ ոք չի հասկանում, թե ինչ օրենսդրությամբ են առաջնորդվում, Քոչարյանը հեգնեց՝ պետք է նայել, գուցե այլ երկրի օրենսդրությամբ են առաջնորդվում։

«Մտահոգությունները լավ կյանքից չեն։ Մտահոգությունները եկել են նրանից, որ մի քանի օր առաջ «SMS»-ով ԲԴԽ նախագահը փախավ պաշտոնից, յուրաքանչյուր քաղաքացի կարող է մտածել, որ եթե այդ պաշտոնը զբաղեցնող անձը՝ օրենքով ամենապաշտպանված մարդը, մեկ «SMS»-ով փախչում է պաշտոնից՝ ինչ իրավիճակում են հայտնվում դատավորները, երբ նման նամակ են ստանում։ Բոլոր դատավորները պետք է մտածեն՝ ԲԴԽ նախագահն ինչու մեզ այսպես խայտառակեց ու մեզ թողեց այս իրավիճակում»,- ասաց Ռոբերտ Քոչարյանը, ինչին արձագանքելով դատավոր Սարգիս Պետրոսյանը նշեց՝ ԲԴԽ նախագահն իր ղեկավարը չէ, դատավորն անկախ է, Քոչարյանն էլ հակադարձեց՝ ԲԴԽ-ի հիմնական ֆունկցիան դատավորների անկախությունը պաշտպանելն է․ «Եթե ԲԴԽ-ն չի կարողանում պաշտպանել իր անկախությունը, ապա ձեր բանը բուրդ է»։ Քոչարյանը նշեց՝ այս մտահոգությունները օդից չեն, ստեղծել են «SMS» ուղարկող մարդիկ և պաշտոնից հրաժարական տված մարդիկ, բնական է հարցադրումը՝ այս դատավորը «SMS»-ով հարց լուծող է, թե՝ ոչ։

«Համոզված եմ՝ մտքում մտածում եք՝ արա, էս ինչի մեջ ընկա, ինչի էս գործն ընկավ ինձ։ Չեմ նախանձում Ձեզ։ Դուք կարող էիք այս գործը վարույթ չընդունել կամ ուղարկել ՍԴ, ասել՝ այս ճաշը, որ եփել եք, ցույց տվեք դուրս գալու ճանապարհը։ Օրինական լուծում չկա, ով անօրինական լուծումներ է ունենում այս հնչեղության գործում, առաջին հերթին՝ կորուստներ է ունենում մասնագիտական տեսանկյունից։ Լավ իրավաբանի համար մասնագիտական համբավը, կարծում եմ, կարևոր է։ Երկրորդը՝ մի ուսապարկ օրենքի խախտում է շահարկում, որի համար վաղ, թե ուշ՝ պատասխան տալու ժամանակն է գալու՝ կարգապահական վարույթով կամ ավելի լուրջ։ Իմ հորդորը հետևյալն է՝ չգնաք օրենքի հաշվին այս կնճիռը փորձեք լուծել․ սա լավ ճանապարհ չէ։ Պետք է տալ հստակ ռադիկալ լուծում, բայց օրենքի շրջանում, ուրիշ տարբերակները վատ են՝ թե անձի համար, թե երկրի համար, թե ազգի համար։ հասկանում եմ, չեմ նախանձում»,- նշեց Ռոբերտ Քոչարյանը։

Հիշեցնենք, որ 2008թ․ մարտի 1-ի իրադարձություններին առնչվող՝ իբրև սահմանադրական կարգի տապալման գործով մեղադրյալի կարգավիճակում էին ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում էին սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։ ՍԴ-ի կողմից՝ 2021թ․ մարտի 26-ին ՀՀ Քրեական օրենսգրքի (2003թ․) 300,1-րդ հոդվածը Սահմանադրության 78-րդ և 79-րդ հոդվածներին հակասող և անվավեր ճանաչելուց հետո Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, սահմանադրական կարգի տապալման դրվագով կարճել էր քրեական գործը և դադարեցրել քրեական հետապնդումը՝ հանցադեպի բացակայության հիմքով, թեև դատախազները պահանջում էին վերաորակել արարքը։ Դատախազության վերաքննիչ բողոքը մերժվել է, իսկ Վճռաբեկ դատարանը դիմել էր ՍԴ՝ վիճարկելով Քրեական դատավարության օրենսգրքի մի շարք հոդվածների Սահմանադրությանը համապատասխանելու հարցը: Խնդիրը 1998-ին ընդունված, այժմ մասնակի գործող Քրեական դատավարության օրենսգրքի 309.1 հոդվածի 3-րդ մասն էր, որը հնարավորություն չէր տալիս հոդվածը հակասահմանադրական ճանաչելուց հետո դատարանում վերաորակել մեղադրանքը: ՍԴ-ն որոշել է մասնակի բավարրարել դիմումը՝ նշելով, որ թեև հոդվածը համապատասխանում է Սահմանադրությանը, այն մեկնաբանությամբ, որ ամբաստանյալին մեղսագրվող արարքը հակասահմանադրական ճանաչվելիս մեղադրողը կարող է մինչև դատարանի խորհրդակցական սենյակ հեռանալը փոխել ամբաստանյալին առաջադրված մեղադրանքը մեղադրյալի արարքում քրեական օրենքով նախատեսված այլ արարքի հատկանիշների առկայության պարագայում՝ անկախ դատական քննության ընթացքում ապացույցների հետազոտումից:

Վճռաբեկ դատարանը որոշել է բավարարել դատախազության բողոքը։

Հեղինակ՝ Իզաբել Սահակյան

Աղբյուր` Փաստինֆո