Փաստ ինֆո

Պերճ Պռոշյանի առածանուց որպես վերնագիր ընտրվածը ճիշտ և ճիշտ բնորոշում է քպական առաջնորդի այսօր արված հայտարարությունը, որն, ըստ էության, զրոյացնում է ԱԺ խոսնակի կարծիքը խնդրո առարկա հարցի մասին, ընդ որում, և՛ քաղաքապետի թեկնածուի, և՛ ընտրական ժամանակի հետ կապված՝ փաստելով, որ քպականների շրջանում չկա այլ տեսակետ՝ առաջնորդի տեսակետից բացի։

Հիշեցնենք, որ օրեր առաջ, ԱԺ խոսնակ Սիմոնյանի հայտնած տեսակետը, թե՝ Գյումրիի ավագանու ընտրություններին «Քաղաքացիական պայմանագիր» կուսակցության քաղաքապետի թեկնածուն կլինի Շիրակի նախկին մարզպետ, ԱԺ «Քաղաքացիական պայմանագիր» խմբակցության պատգամավոր Կարեն Սարուխանյանը, այսօր տվյալ քաղաքական ուժի առաջնորդը ժողովրդական խոսքով ասած՝ «ջրեց»՝ այս համատեքստում հրապարակ բերելով նոր մոտիվ։ Այն է՝

Գյումրիում դեկտեմբերի 8-ին, 9-ին, 10-ին կկայանան նախնական ընտրություններ․․․

Հետաքրքիր է, որ աջուձախ, տարբեր ոլորտներում օրենքին հակասող որոշումներով պաշտոնյաների ազատումներ և նշանակումներ իրականացնող քպական առաջնորդը հանկարծ հիշել է, որ ոչ վաղ անցյալում ի՜նչ պսպղուն, ի՜նչ ժողովրդավարական հանդերձ հագած էր ինքը ներկայանում։ Հիշել է և որոշել՝ ժողովրդավար փրայմերիզների արդյունքում ինքը կնշանակի համայնքի ղեկավարի պաշտոնակատար․․․

Ինչի՞ մասին է վկայում այս ամենը։ Արդյո՞ք սա իշխանության, ի մասնավորի փաշինյանական վախերի մասին փաստում չէ։ Ի վերջո, նա հասկանում է, որ գործ ունի Հայաստանի երկրորդ քաղաքի հետ, ուր, մեղմ ասած՝ վիճակը ճգնաժամային է։ Այնքան ճգնաժամային, որ «Առաջնորդը ես եմ, բակլեն խաշած եմ ցանում»-ը կարող է վերածվել՝ թեկուզ՝ ձևական քննարկման, հետո միայն՝ խաշած ցանելու․․․

Ժողովրդավարական բաստիոնի մասին հուշերով տարվածի ժողովրդավարությունը, այս դեպքում խիստ դժվար է տարածել նույնիսկ սեփական կուսակցության վրա, քանի որ վաղուց, անկեղծ ասած՝ ի սկզբանե /հիշենք, թե՝ Զարուհի Փաստանջյանին ի՜նչ համառությամբ իջեցրեց ամբիոնից բաստիոնի կողակիցը/ այնտեղ ժողովրդավարություն չի եղել։

Ասում է՝ «Քաղաքացիական պայմանագիր» կուսակցության վարչության հետ՝ եկել եմ այն եզրակացության, որ այդտեղ խնդիրը միանձնյա վարչական որոշմամբ չի կարող լինել: Մենք կխնդրենք ՔՊ-ի անդամներին, համակիրներին առաջադրեն թեկնածուներ կամ ինքնառաջադրվեն: Քվերակության արդյունքում կընտրվի թեկնածուն, որին կնշանակեմ պաշտոնակատար, և ամենայն հավանակությամբ, նա էլ կդառնա ՔՊ-ի թեկնածուն»։

Իսկ թե՝ քվերակության արդյունքում ընտրվածը կլինի քպական մեծամասնությա՞ն նախընտրած թեկնածուն, թե՞ բացառապես նրանց առաջնորդի նախընտրելին, որը և կդառնա ՔՊ-ի թեկնածուն, հետո կիմացվի։

Ներկայացումից հետո․․․

Ի դեպ, «ալենանիկոլական» տեսակետների տարբերություններն էլ կարելի՝ ներկայացում է։ Ժողովրդավարության նշան․․․

Աղբյուր` Փաստինֆո