Փաստ ինֆո

Գործող իշխանությունը Գյումրիում կանգնած է լուրջ ճգնաժամի առաջ, ես ասել եմ, ու հիմա էլ պնդում եմ՝ Գյումրին «սև արկղ» է այս իշխանության համար։ Այս մասին «Փաստինֆոյի» հետ զրույցում ասաց կառավարման գյումրեցի փորձագետ Արթուր Գևորգյանը՝ անդրադառնալով Նիկոլ Փաշինյանի հայտարարությանը, թե Գյումրիում պատրաստվում են անցկացնել փրայմրիզ, որի արդյունքում կընտրվի այն անձը, ով կնշանակվի քաղաքապետի ԺՊ, որից հետո նույն այդ մարդը հետագայում նաև կգլխավորի ՔՊ նախընտրական ցուցակը։

Նա ընդգծեց, որ Գյումրիի ՔՊ քաղաքային կառույցի ներսում վեճեր կան։ «Խնդիրները պայմանավորված են ՔՊ-ի կուսակիցների ու ակտիվ համախոհների թեկնածուի մասին պատկերացումների հետ։ Այսինքն, մեկն ասում է՝ ես եմ քաղաքապետը ու մարդկանց հավաքում է իր շուրջը, մյուսն ասում է՝ ես եմ։ Երևանում էլ ամեն ամեն մեկն ունի իր նախընտրելի թեկնածուն, ու այս ամբողջի հիմքում այն է, որ իշխանական նավը ճաքեր է տվել և այդ ճաքերը մենք տեսնում ենք ոչ միայն Գյումրիում, այլ նաև խորհրդարանում ու կառավարությունում։ Գյումրին այս ամենի համատեքստից դուրս կամ ներս լինել չի կարող, այդ համատեքստի կենտրոնն է։ Այսինքն, ներքևի օղակում կա լուրջ անհամաձայնություն վերևների հետ, որի արդյունքում Գյումրին դարձել է կռվախնձոր»։

Նրա դիտարկմամբ՝ խնդիրները առավել քան լուրջ են և միայն պատգամավոր Կարեն Սարուխանյանի թեստի ու դրա արդյունքներով է որ պայմանավորված են։

«Նիկոլ Փաշինյանի երեկվա լայվի ներոք ամենատարբեր առաջարկները կան թեկնածուների մասով, իմ մոտ տպավորություն է, որ Նիկոլ Փաշինյանը հենց լայքերի ու մեկնաբանությունների շատ ու քիչ լինելու արդյունքում է ընտրելու Գյումրիի քաղաքապետ, ճիշտն այնպես, ինչպես ասում է, որ ասուլիսներում ամենաշատ լայք հավաքած հարցերին կանդրադառնամ»։

Ըստ Գևորգյանի՝ Գյումրիում կառավարման տոտալ ոչինչացում է տեղի ունենում, քաոտիկ վիճակ է ստեղծվել։ «Արդյունքում,տպավորություն ունեմ, որ ստացվելու է այնպես, որ նա՝ ով Գյումրիում տոնածառը «տնգացնի», ոչ թե կանգնեցնի, հենց նա էլ կդառնա քաղաքապետ»։

Փորձագետի դիտարկմամբ՝ բացի իշխանական ուժերից կան նաև այլ ուժեր, ովքեր շատ ակտիվ արդեն հայտարարում են իրենց մասնակցության մասին, ընդ որում՝ այդ ուժերից շատերը հավաքելու են իրենց անհրաժեշտ ձայները։ «Ես վստահ եմ, որ որևէ ուժ բացարձակ մեծամասնություն չի կազմելու։ Ավելին ոչ իշխանությունը, ոչ որևէ այլ ուժ չունի թեկնածու, որը 50+1 տոկոսով ավագանի կձևավորի։
Ամենալավատեսական կանխատեսումներով՝ ՔՊ-ն հավաքելու է 30 տոկոս ձայն, և սա վարչական ռեսուրսով ու բոլոր լծակները օգտագործելով։

Ես շարունակում եմ մնալ այն կարծիքին, որ թե Գյումրիի, թե նաև հենց Փաշինյանի ու իր թիմի համար ամենաձեռնատու ուժը «Բալասանյան դաշինքն» էր։ Նրանց ձեռք տալով Նիկոլ Փաշինյանը բացեց «Պանդորայի արկղը» ու էսօր դրա տակից չի կարողանում դուրս գալ»։

Գևորգյանը կարծում է, որ Փաշինյանի հայտարարած փրայմերիզը, ինչ մեթոդով էլ դա անի՝ դառնալուի է քաղաքային վեճերի հակասություննրի ու բախումների առիթ։

«Ընդ որում՝ Գյումրիում կատարվող իրադարձությունները մոդելային են, և ցույց են տալիս այն պատկերը, թե ինչ կատարվում իշխանական վերնախավում, այսինքն, այս տեմպերով շարունակելու դեպքում կարծում եմ, իշխանությունը գարնան սկզբին շատ լուրջ ջանքեր պետք է գործադրի, որ ունա Գյումրիի «Բալասանյան դաշինքի» հրաժարականից առաջ եղած իրավիճակը»։

Աղբյուր` Փաստինֆո