Փաստ ինֆո

Վրաստանում ԿԸՀ-ի ընտրությունների արդյունքների հրապարակումից հետո «Վրացական երազանքը» սկսել է նոր խորհրդարանի ձևավորման աշխատանքները, որը կավարտվի կառավարության և ծրագրի հաստատմամբ։ Կարծում եմ, նաև սա է պատճառը, որ իրենք օր առաջ ուզում են Սալոմե Զուրաբիշվիլուն տուն ճանապարհեն, քանի որ Զուրաբիշվիլու արտաքին ակտիվությունը իրենց համար հավելյալ խնդիրներ է առաջացնում։ Այս մասին «Փաստինֆոյի» հետ զրույցում ասաց վրացագետ Ջոնի Մելիքյանը՝ անդրադառնալով «Վրացական երազանքի» կողմից Միխեիլ Կավելաշվիլին նախագահի պաշտոնում առաջադրմանը։

Նրա արձանագրմամբ՝ 4 ընդդիմադիր քաղաքական ուժերից 3-ը չեն պատրաստվում պառլամենտական գործունեությանը միանալ և միայն Զախարիայի խմբակցության հարցն է օդում, ուստի, վստահաբար կարելի է ասել, որ որևէ քաղաքական ուժ չի կարող առաջադրել թեկնածու, որը կկարողանա ունենալ ընտրիչներ 30 ձայն; Հետևապես, հավանական է, որ դեկտեմբերի 14-ին նա կընտրվի նախագահ։

Փորձագետը նշեց, որ Վրաստանը խորհրդարանական երկիր է և նախագահը սահմանափակ լիազորություններ ունի, բայց այս թեկնածուն հայտնի է իր եվրոսկեպտիկական հայտարարություններով։

Վրացագետի գնահատմամբ՝ ընդդիմությունը մուտք չի գործելու խորհրդարան, մանդատները և ցուցակները չեղարկվելու են, ապա ընդդիմությունը շարունակելու է փողոցային պայքարը։ «Այլ հարց է, թե ինչ մասնակցություն կլինի այս ակցիաներին բնակչության կողմից և ինչ չափով աջակցություն կլինի։ Չէի ասի, որ այսօր Վրաստանում տեսնում եմ այն կրիտիկական մասսան դժգոհության, որը կարող է իշխանափոխության բերել կամ արտահերթ ընտրությունների հարց բարձրացնել։

Այս պարագայում, ընդդիմությունը պետք է որոշի, թե ինչ տարբերակով են շարունակելու աշխատանքները; Եթե Կախարիան որոշի, որ մուտք է գործում խորհրդարան ու այնտեղից փորձի վերահսկել իշխանություններին, սա իրենց ավելի ակտուալ կդարձնի գալիք ընտրություններից առաջ, իսկ այն ուժերը, որոնք որոշել են այդ մանդատներից հրաժարվել և մուտք չգործել խորհրդարան, ապա մի քանի տարի անց այլևս

ակտուալ չեն լինի Վրաստանի քաղաքական դաշտի համար, հատկապես այն ֆոնին, որ Վրաստանում կարիք կա այլընտրանքային քաղաքական ուժերի գործիչների, ուստի նախկինում 10-յակ տարիներ գործող քաղաքական գործիչներից հոգնածություն կա այնտեղ։Դա է նաև պատճառը, որ «Վրացական երազանքը», որ շատ էր քննադատվում Վրաստանի բնակչության կողմից, այլընտրանք չունենալու պատճառով ստացավ շատերի քվեն, մարդիկ չարիքներին նվազագույնն էին համարում հենց այս ուժը»,- նշեց փորձագետը։

Ինչ մնում է տարածաշանի նկատմամբ Արևմուտքի հետաքրքրություններին, ապա Մելիքյանի խոսքերով, Արևմուտքի համար շատ կարևոր է, որ Հայաստան-Վրաստան տանդեմն աշխատի, եթե երկուսից մեկը, կամ Վրաստանը իրենց հետ վատ հարաբերություններ ունի, ապա դա չի կարող չազդել Հայաստան-Արևմուտք հարաբերությունների դինամիկայի վրա»։

Աղբյուր` Փաստինֆո