Փաստ ինֆո

Մեր օրենսդրությունը ոչ բոլոր հարցերին է պատասխանում, մենք Գյումրիում ստիպված ենք նշանակել ժամանակավոր պաշտոնակատար, ընդ որում, պետք է օրենսդրական ևս մեկ փոփոխություն անենք դրա համար։ Եթե որևէ փոփոխություն չանենք՝ կստացվի քաղաքը պետք է առանց կառավարել մնա։ Այս մասին ԱԺ-ում լրագրողների հետ զրույցում ասաց ՀՀ Էկոնոմիկայի նախարար Գևորգ Պապոյանն՝ անդրադառնալով Նիկոլ Փաշինյանի նախօրեին արած հայտարարությանը, թե Գյումրիում կանցկացնեն «փրայմերիզ»՝ ԺՊ նշանակելու համար, նույն անձը հետագայում նաև կդառնա Գյումրիում ՔՊ-ի քաղաքապետի թեկնածուն։

«Մենք ինքներս հակված ենք եղել նրան, որ չգնանք դրան։ Մենք չէինք պատրաստվում օրենքից շեղվել, բայց վարչապետը պետք է Գյումրիում նշանակի քաղաքապետի ԺՊ, մենք ուզում ենք նշանակենք այն մարդուն, ում գյումրեցիները կցանկանան տեսնել»։
Հարցին, թե ինչու են կարծում, որ գյուրեցիների և ՔՊ-ականների կարծիքը նույնն է՝ Պապոյանն ասաց, որ կուսակցականներով չեն որոշելու։ «Առաջիկայում կտեսնեք, թե ինչպես ենք անելու, գյումրեցիները՝ մեզ սիրող- չսիրող, համախոհ-ոչ համախոհները, կկարողանան իրենց կարծիքն արտահայտել։ Բայց իհարկե, համախոհության տեսանկյունից այդ անձը պետք է համապատասխանի մեզ, բայց միևնույն ժամանակ նա պետք է անցնի այդ ընտրական փուլով և լինի գյումրեցիների նախընտրելին»,-ասաց Պապոյանը։

Դիտարկմանը, թե սա նշանակո՞ւմ է, որ Գյումրիում իշխանությունները չեն ցանկանում գնալ արտահերթ ընտրությունների՝ Պապոյանը վստահեցրեց, որ ոչ, չի նշանակում։ «Գյումրիում ստեղծվել է մի իրավիճակ, որ հաղթած ուժը անպատասխանատվություն է դրսևորել գյուրեցիների և համայնքի նկատմամբ, ստեղծված իրավիճակում այլ ելք չկա, գյումրեցիները պետք է կրկին գնան ընտրական տեղամաս ու կրկին ընտրեն իրենց ավագանին և համայնքի ղեկավարին»,-ասաց նա՝ վստահեցնելով, որ դա լինելու է գյումրեցիների որոշմամբ։

Աղբյուր` Փաստինֆո