Փաստ ինֆո

Բացառում եմ օբյեկտիվ դատական ակտի կայացումը, քանի որ պատվերը դեռ հանված չէ, պատվեր կա, որ Վարդազարյանը պետք է դատվի, օբյեկտիվ հիմքեր ունեմ կարծելու և ենթադրելու, որ լինելու է մեղադրական դատական ակտ։ Օբյեկտիվ քննության հետ որևէ աղերս չունի ոչ այս դատավարությունը, ոչ նախաքննությունը, ոչ մեղադրանքը։ Այս մասին «Փաստինֆո»-ի հետ զրույցում ասաց ԲԴԽ նախկին նախագահ, Երևանի ընդհանուր իրավասության դատարանի նախկին դատավոր Ռուբեն Վարդազարյանը՝ անդրադառնալով իր դեմ իրականացվող քրեական հետապնդմանը։

Ինչ վերաբերում է վերջին շրջանում դատական համակարգում հերթական իրադարձություններին, Փաշինյանի խոստովանությանը, որ խնդրել է Անդրեասյանին՝ հրաժարական տալ, վերջինս էլ՝ ընդունել է, արդյո՞ք դա չի վկայում՝ գործադիրի կողմից անկախ մարմնի գործունեությանը միջամտության մասին, Վարդազարյանը նշեց, որ ակնհայտ է՝ կա միջամտություն, գործադիր մարմնի ղեկավարը հորդորում է, խնդրում է դատական իշխանության ղեկավարին, դա առաջին հերթին քաղաքական գնահատական է պահանջում, ինչից հետո՝ կարող է առաջանալ քրեական պատասխանատվության հարց։

«Ավելի կարևոր կլինի Կարեն Անդրեասյանի բացատրությունը հետագայում, թե ինչ բառեր է պարունակել խնդրանքը, կասի՝ ինչպես է եղել, նամակը ցույց տա, որովհետև երկուսն էլ չեն հերքում»,- նշեց Վարդազարյանը՝ արձանագրելով, որ քաղաքական գնահատականը հետևյալն է՝ մարդը չի պատկերացնում, թե ինչ է նշանակում իշխանությունների տարանջատման սկզբունքը, ակնհայտորեն Հանրային ՀԸ-ի եթերում ասում է՝ ինքն է խնդրել, չի հասկանում ինչ է դա նշանակում, դա տարրական ժողովրդավարության և տոտալիտարիզմի տարբերությունն է։

«Երբ գործադիրի ղեկավարը խնդրում է դատական իշխանության ղեկավարին՝ հրաժարական տալ, դա տոտալիտար պետության մասին է խոսում։ Չխնդրելը, չմիջամտելն իրական ժողովրդավարության մասին է խոսում։ Կարծում եմ՝ Նիկոլ Փաշինյանն ամբողջությամբ չի պատկերացնում իր արածի քաղաքական և քրեաիրավական հետևանքները, դրա համար շատ հանգիստ տոնով ասում է՝ այո, ես եմ խնդրել։ Հետագայում, երբ գնահատական տրվի, որը տրվում է՝ նույնիսկ Հանրային ՀԸ եթերում են տարակուսած ասում, թե արդյոք սա միջամտություն չէ»,- նշեց Վարդազարյանը՝ հիշեցնելով, որ նույն խնդրանքը նաև իրեն է եղել, որ քաղաքական իշխանությունը չի ցանկանում իր հետ աշխատել, պետք է հեռանա։
«Ես վառ օրինակն եմ, թե ինչ է լինում, երբ այդ խնդրանքը չեն կատարում, դա նշանակում է՝ հորինված գործով քրեական հետապնդում և լիազորությունների դադարեցում՝ շատ ավելի խայտառակ հիմնավորումներով։ Իմ լիազորությունները դադարեցվել են մի դատական նիստի ընթացքում, որին ես ծանուցված չեմ եղել»,- ասաց Վարդազարյանը՝ նշելով, որ առանց պատշաճ ծանուցման նիստ չի կարող տեղի ունենալ։

Դիտարկմանը, որ կարծես թե դրանից հետո ԲԴԽ-ում արդեն իսկ ձևավորված պրակտիկա է եղել՝ նաև Կարեն Անդրեասյանի պաշտոնավարման ժամանակ, որ առանց դատավորներին լսելու՝ քննել և դադարեցրել են դատավորների լիազորությունները՝ Դավիթ Հարությունյանի, Աննա Դանիբեկյանի գործերով, ավելին՝ ՍԴ-ի կողմից դատավոր Դավիթ Հարությունյանի՝ լսված լինելու իրավունքի խախտման արձանագրման որոշումը ԲԴԽ-ն չի կատարում, Վարդազարյանը նշեց, որ եթե առաջին դեպքից հետո անխուսափելի չի դառնում պատիժը, դա ունենում է զարգացումներ, ճյուղեր, դառնում՝ նորմալ երևույթ, քանի որ տոտալիտար ռեժիմը ժողովրդավարությունից դրանով է տարբերվում։

«Նույնիսկ առաջին կուրսի ուսանողը գիտի, որ դա անթույլատրելի է, բայց դա ամենուրեք է տեղի ունենում։ Վստահ եմ, որ կգա օրն ու ժամը, որ այն դատավորները, որոնք դա թույլ են տվել, պատասխանատվության են ենթարկվելու»,- ասաց նա։
Հարցին՝ արդյո՞ք ԲԴխ-ն չի հարգում Բարձր դատարանի որոշումը՝ չկատարելով որոշումը, Վարդազարյանը պատասխանեց․ «Եթե դատարանը չի հարգում Անկախության հռչակագիրը, Սահմանադրությունը, քաղաքացիական դատավարության օրենսգիրքը՝ ՍԴ-ն ով է, որ ՍԴ որոշումը հարգվի։ Ես էլ լինեի՝ չէի հարգի, լավ է արել Կարեն Անդրեասյանը»։

Ինչ վերաբերում է Գագիկ Ջհանգիրյանի աղմկահարույց ձայնագրության գործին, որը մի քանի անգամ կարճվել, ապա՝ վերաբացվել է, Վարդազարյանը նշեց, որ տեղեկություն չունի գործի ընթացքից, որովհետև չի հետաքրքրում, այս իշխանության օրոք այդ գործը հեռանկար չունի։

Հեղինակ՝ Իզաբել Սահակյան

Աղբյուր` Փաստինֆո