Փաստ ինֆո

Հրադադարը Լիբանանում գործում է առավոտյան ժամը 4-ից։ Փախստականները վերադառնում են իրենց շրջանները։ Այս մասին «Փաստինֆո»-ին ասաց Լիբանանում «Ազդակ» օրաթերթի գլխավոր խմբագիր Շահան Գանտահարյանը՝ նշելով, որ հրադադարի պայմաններն ամբողջությամբ գաղտնազերծված չեն, պարզ չեն, բայց, ըստ առկա տեղեկատվության, դրա հիմքում ՄԱԿ-ի 1701 բանաձևն է։

Ըստ նրա՝ նախատեսվում է, որ գործելու է վերահսկող հանձնաժողով, որի կազմում ընդգրկված են լինելու Լիբանանը, Իսրայելը, միջազգային խաղաղապահ ուժերի ներկայացուցչիչներ, ԱՄՆ֊ն և Ֆրանսիան, բայց Լիբանանում գիտեն, որ այն ղեկավարելու է Միացյալ Նահանգները։

«Համաձայնություն կա նաև ՝ իրականացնել ցամաքային սահմանազատում։ Բացի այդ՝ կողմերին իրավունք է տրվել միջամտել՝ հակառակորդի մոտ սպառազինության որեւէ շարժ նկատելու դեպքում։ Սա Իսրայելի պահանջած կետն էր, որն, ըստ որոշ տեղեկությունների, համաձայնության մեջ մտել է, սա նշանակում է, որ եթե Իսրայելը նկատի, որ զինվորական տեղաշարժ կա Հեզբոլլահի կողմից, ապա կարող է պատասխանել։Մնացյալը, կարծում եմ, ՄԱԿ -ի 1701-րդ բանաձևը կգործարկվի»,- նշեց բանախոսը:

Նրա փոխանցմամբ՝ դա ենթադրում է, որ «Հեզբոլլահի» ուժերը հետ կքաշվեն, 60 օրվա ընթացքում աստիճանաբար լիբանանյան տարածքները կլքեն իսրայելական ուժերը, կտեղակայվի բանակը։

Շ. Գանտահարյանի խոսքերով՝ ՀԱՄՄԱՍ֊ի ղեկավարությունը ևս հայտարարել է, որ պատրաստ են գնալ հրադադարի։

«Կարծում եմ , որ այս համաձայնությունը, ըստ էության, Վաշինգտոն֊Թեհրան համաձայնություն է, որովհետև ամերիկյան մամուլը գրում էր, որ, ըստ պաշտոնական աղբյուրների, չէր լինի այս համաձայնությունը, եթե Թեհրանն արգելակեր կամ չհամաձայներ։ Փաստորեն աշխատել է դիվանագիտությունը՝ Իրան֊ Միացյալ Նահանգներ գծի վրա։ Ասեմ, որ Լիբանանում այսօր սպասվում է ֆրանսիացի պատվիրակ Լեդրիանի այցը»,- նշեց նա՝ կարծիք հայտնելով, որ հնարավոր է օրակարգ բերվի Լիբանանում նախաահի ընտրության հարցը։

Աղբյուր` Փաստինֆո