Փաստ ինֆո

Համայնքային ոստիկանության Եղեգնաձորի բաժնի ծառայողները ստացած օպերատիվ տեղեկությունն իրացրին Քրեական ոստիկանության Վայոց ձորի մարզային վարչության գործընկերների հետ: Պարզվեց, որ նոյեմբերի 19-ին, ժամը 23-ի սահմաններում, Եղեգնաձորի Սպանդարյան փողոցում՝ մթերային խանութի դիմաց, յոթ տղամարդ կենցաղային հարցերի շուրջ մոտ 10 րոպե վիճաբանել են միմյանց հետ, հնչեցրել սեռական բնույթի հայհոյանքներ: Այդ ընթացքում Երևանի 19-ամյա բնակիչն իր մոտ եղած ատրճանակով կրակել է, ինչից հետո 34-ամյա և 40-ամյա տղամարդիկ 19-ամյա երկու երիտասարդի հետ «Սուզուկի» մակնիշի մեքենայով դիմել են փախուստի:

Նոյեմբերի 20-ին, կեսգիշերից քիչ անց, վեճի մասնակից 42 և 41 տարեկան տղամարդիկ, խմբի կազմում խուլիգանություն կատարելու կասկածանքով, ձերբակալվել և տեղափոխվել են Եղեգնաձորի բաժին:

Հետագա միջոցառումներն իրականացվեցին Արարատի մարզային վարչության քրեական ոստիկանների և պարեկների հետ: «Սուզուկի» մակնիշի մեքենան հայտնաբերվեց Արարատի մարզի Զոդ բանավանի տարածքում: Մեքենայում եղած չորս տղամարդիկ էլ ձերբակալվեցին ու տեղափոխվեցին Համայնքային ոստիկանության Վեդիի բաժին: Ատրճանակը մեքենայում էր:

Կազմված փաստաթղթերը և ձերբակալված տղամարդիկ ներկայացվեցին Վայոց ձորի մարզային քննչական վարչություն, իսկ այստեղ նախաձեռնված քրեական վարույթի շրջանակներում ի հայտ եկան նոր հանգամանքներ:
Ձեռք բերվեցին փաստական տվյալներ, որ վիճաբանության ընթացքում չորս հոգին, նրանցից մեկի կողմից զենքի գործադրմամբ, փորձել են առևանգել եղեգնաձորցի 41-ամյա տղամարդուն, ինչը, սակայն, իրենց կամքից անկախ ավարտին հասցնել չեն կարողացել:

Քրեական օրենսգրքի 44-191-րդ հոդվածի հատկանիշներով` մարդուն առևանգելու փորձը, նախաձեռնվել է քրեական վարույթ: 40-ամյա եղեգնաձորցին և 19-ամյա երևանցին դատարանի որոշմամբ կալանավորվել են: Նախաքննությամբ հանգամանքները պարզվում են:

Աղբյուր` Փաստինֆո