Փաստ ինֆո

Արգիշտի Քյարամյանի՝ ամբողջ պաշտոնավարման ընթացքում Փաշինյանին չի հետաքրքրել, թե ինչպես են ընթանում քննությունները, թեև մենք միշտ բարձրաձայնել ենք, որ քննություններ չեն իրականացվում, կոծկվում են, հատկապես՝ զինվորական գործերը։ Քյարամյանն ԱԺ-ում հայտարարում էր, որ մի քանի ժամում բացահայտում են գործերը։ Եթե այս ամենին ավելացնենք նաև Արթուր Պողոսյանի վերաբերյալ նախնական խոսակցությունները՝ կոռուպցիոներ լինելու մասին, տեսնում ենք, որ Նիկոլ Փաշինյանին դա չի հետարքրում։ Այս մասին «Փաստինֆո»-ի հետ զրույցում ասաց իրավապաշտպան Ժաննա Ալեքսանյանը՝ անդրադառնալով աղմկահարույց հրաժարականներին։

Հիշեցնենք, որ նոյեմբերի 17-ին՝ կիրակի օրը, ուշ գիշերին հայտնի դարձավ հրաժարականների շքերթի մասին, իսկ երկուշաբթի առավոտյան արդեն մեկը մյուսին հաջորդելով իրենց հրաժարականների մասին հայտարարեցին ԲԴԽ, ՀԿԿ, ՔԿ ՊԵԿ նախագահները, Ներքին գործերի ու տարածքային կառավարման նախարարները։ Ամենաուշագրավը ԲԴԽ նախագահի պաշտոնից Կարեն Անդրեասյանի հայտարարությունն էր, որով դրվեց հրաժարականների սկիզբը։

Ընդ որում, Նիկոլ Փաշինյանը խոստովանել է, որ Կարեն Անդրեասյանին և իրավապահ կառույցների ղեկավարներին, որոնք օրենսդրությամբ անկախ մարմիններ են համարվում, ինքն է «խնդրել» հեռանալ։ Նա նաև հայտնել է, որ պատրաստվում է ՔԿ նախագահի պաշտոնում առաջարկել ՀՀ գլխավոր դատախազի տեղակալ Արթուր Պողոսյանի թեկնածությունը։ Նշենք, որ Արթուր Պողոսյանը՝ մինչ գլխավոր դատախազի տեղակալ լինելը՝ աշխատել է որպես դատախազ, այնուհատեև, 2020թ․ տեղափոխվել ԱԱԾ՝ որպես քննչական դեպարտամենտի ղեկավար։ Նրա անունը մամուլում բազմիցս շոշափվել է տարբեր կոռուպցիոն սկանդալներում, ինչին նոյեմբերի 22-ի իր հարցազրույցում անդրադարձել է նաև Նիկոլ Փաշինյանը՝ խոսելով Պողոսյանի նշանակման մասին։

«Ես ուզում եմ ասել, որ 2020թ․ Արթուր Պողոսյանը նշանակվել է ԱԱԾ ՔԴ ղեկավար։ Այդ նույն ահազանգերը ստացել եմ այն ժամանակ, շատ խորը ուսումնասիրություն է իրականացվել, այդ ահազանգերը, որոնք կրկին վերակենդանացվել են՝ հերքվել են։ Հետագայում նշանակվել է ԳԴ տեղակալ։ Այդ ահազանգերը նորից վերակենդանացել են, ևս մեկ անգամ ստուգվել են, հերքվել։ Այդ ահազանգերը ևս մեկ անգամ կստուգվեն, քանի որ երկու անգամ հերքվել են, մեծ է հավանականությունը, որ ևս մեկ անգամ կհերքվի»,- նշել էր Փաշինյանը՝ հավելելով, որ երբ ևս մեկ անգամ հերքվեն, Պողոսյանը կնշանակվի ՔԿ նախագահ։ Փաստացի, Փաշինյանն իր հայտարարությամբ արդեն իսկ ուղղորդել է՝ Արթուր Պողոսյանի մասով կոռուպցիոն հնարավոր ռիսկերի մասին տեղեկությունները պետք է հերքվեն՝ անկախ ամենից։

Ժաննա Ալեքսանյանը «Փաստինֆո»-ի հետ զրույցում նկատեց՝ տեսնում ենք՝ Փաշինյանին այս ամենը չի հետաքրքրում, խոսել է դրա մասին, հետո՝ նշանակելու է, հանրության հետ էլ հաշվի չի նստում, որ եթե բարձրաձայն ասում է, նշանակում է՝ պետք է նաև բարձրաձայն ասի՝ պարզել է, որ կոռուպցիոներ չէ։

«Իր այս վարքագիծը հավաստում է այն մասին, որ իրեն չի հետաքրքրում՝ այդ կառույցներն ինչպես են աշխատում, որ չի պարզել՝ կոռուպցիոները, կամ գլխավոր դատախազը․․․ Քյարամյանին աշխատանքից ազատում է, գլխավոր դատախազին՝ ոչ, Քյարամյանին հսկում է դատախազը։ Վարչապետն է որոշում, չի էլ ասում՝ դատախազությունը համաձայն է իր հետ, թե՝ ոչ, ինչ ուզում՝ անում է, մտքով ինչ անցնում է։ Ես էլ դրական բան չեմ տեսել։ Չեմ պատկերացնում, որ զինվորական դատախազության, ՔԿ աշխատանքի մասին կարելի է դրական բան լսել, բոլորն էլ բողոքում են և դա տեղին է։ Վստահ եմ ասում՝ բանակում սպանությունները դարձնում են ինքնասպանություններ, այդպես՝ քննություն վարում, գործերը՝ դատարան ուղարկում»,- նշեց Ալեքսանյանը՝ հավելելով, որ Արթուր Պողոսյանին չի ճանաչում, բայց կարծում է՝ այդ ավանդույթների կրողն է։

«Փաշինյանն իր հարմարությանն է նայում, ոչ թե՝ մտածում, որ պատասխանատու անձի նշանակի պաշտոնին, այլ՝ նրանց, որոնք իրեն ենթակա են, հպատակ են և դա ինքը կօգտագործի իր շահերի համար։ Դրանով է առաջնորդվում»,- նշեց Ալեքսանյանը։

Ինչ վերաբերում է Կարեն Անդրեասյանի՝ Փաշինյանի «խնդրանքով» հրաժարականին, ապա Ալեքսանյանը նշեց, որ ԲԴԽ-ն անկախ մարմին է, իրավունք չունի ԲԴԽ-ի մասով խոսելու, այդտեղից պետք է հասկանալ, որ դատական անկախ մարմին Հայաստանում չկա և Փաշինյանը չի էլ թողնի, որ այդպիսի ատյան գոյություն ունենա, դրա համար էլ՝ խոսքում սիրով օգտագործում է՝ առանց հաշվի նստելու, որ ինքը ոչ մի ազդեցություն չունի ԲԴԽ-ի վրա։

«Դատական մարմին է՝ գործադիրից անկախ, բայց մենք տեսնում ենք, թե ինչպես է նրա ձեռքն ամեն տեղ հասնում, իր ուզած մարդկանց նշանակում, հանում, առանց համակարգային լուծումներ ասելու, չի էլ ասում՝ ինչու է մարդկանց հանում, խնդրել է, նրանք էլ՝ դուրս են եկել։ Օրենքը Հայաստանում չի գործում և այդ կանոնակարգերը, որով վարչապետը պետք է առաջնորդվեր, մենք դա չենք տեսնում, «SMS»-ով խնդրել է, նրանք էլ՝ պատասխանել են խնդրանքին։ Հանրությանը ոչ մի բանի տեղ չեն դնում, երևի նստել մի տեղ՝ ուտել-խմելուց որոշել, որ այս մարդիկ պետք է դուրս գան, հետո՝ «SMS» ուղարկել, բայց մարդկանց այդպես չեն նշանակում կամ աշխատանքից ազատում։ Այդ անլուրջ, իմիջիայլոց մոտեցումը ցույց է տալիս, թե ինչպես է նա ընդհանրապես վերաբերում այդ կառույցների աշխատանքին»,- նշեց Ալեքսանյանը։

Հարցին՝ արդյո՞ք Կարեն Անդրեասյանին հրաժարական տալը խնդրելը չի նշանակում, որ միջամտում են սահմանադրական անկախ ինստիտուտի գործունեությանը, քրեորեն պատժելի արարք չէ՝ Ալեքսանյանն արձագանքեց՝ նշելով, որ միջամտություն տեսնում է, պարզ երևում է, որ պայմանավորվածություն կա, եթե ասել է, որ խնդրել է։

«Դրանով նա ցանկանում է ասել, որ ԲԴԽ-ն ընդհանրապես ինքնուրույն չի կարող լինել։ Մինչև այդ չէր ասել, որ Կարեն Անդրեասյանին խնդրել է։ Կարծում եմ՝ դիտավորյալ է ասել»,- նշեց նա՝ հավելելով, որ հանրության հետ հաշվի չեն նստում, ատյանները, որոնք պետք է ամբողջությամբ անկախ լինեին՝ ԲԴԽ-ն, թեկուզ՝ մյուսները, Փաշինյանը ցանկանում է ցույց տալ, որ իր ենթակայության տակ են լինում, ինքը ինչպես ցանկանա՝ այդպես էլ կլինի, այդպես էլ կա։

Դիտարկմանը, որ Փաշինյանը հայտարարում է, թե ինքն է պատասխանատու, այդ դեպքում՝ ինչու հրաժարական չի տալիս հենց ինքը, թեև վեց տարի ինքն է իշխանության, ավելի վաղ այդ խնդիրները չե՞ն տեսել, Ալեքսանյանը պատասխանեց․ «Ինքն իրեն համարում է անփոխարինելի՝ երևի։ Չե՞ք նկատել՝ մեղքը միշտ բարդում է ուրիշների վրա, անգամ՝ ամենահասարակ հարցերում։ Ընդհանրապես այդտեղ անհավասար պայմաններ են, ինչպես ինքը կամենա։ Թեև Քյարամյանը փորձում էր կամենալ, ԱԺ-ում հայտարարում էր, թե իրեն բան ասողը դեռ չի ծնվել։ Այնտեղ բոլորը լսում և ենթարկվում են։ Գիտեք՝ մենք տեսնում ենք, որ կադրերը, որոնց առաջ են քաշում, գնալով ավելի ցածրորակ են, ինչը նաև նրա արդյունքն է, որ Փաշինյանը տանել չի կարողանում խելացի և գրագետ մարդկանց իր շրջապատում և չունի։ Դրա համար էլ փլուզվել է ամեն ինչ, նույնիսկ՝ գրագետները հարմարվում են Փաշինյանի հետ, թե ինչ պայմաններ է թելադրում՝ չեմ կարող ասել։ Համակարգայինի մասին խոսելն անգամ ավելորդ է։ Նա խաբում է հանրությանը, ասում է՝ քննարկումներ է տեսել, թե դժգոհություններ կան, ինքն իր դժգոհությունների մասին չի խոսում, որ նախարարներին հանում է։ Նա ստում է, ուղղակի «ռակիրովկաներ» է անում, կտեսնենք առաջիկայում՝ ինչի համար։ Հնարավոր է՝ ընտրություններից առաջ է անում, նոր գործառույթներ է նախապատրաստել, նրանք էլ՝ պատրաստ են ծառայել»։

Հեղինակ՝ Իզաբել Սահակյան

Աղբյուր` Փաստինֆո