Փաստ ինֆո

Իրանի նկատմամբ պատժամիջոցներ կիրառելու ՄԱԳԱՏԷ-ի որոշումը շատ անսպասելի էր, փոքր ինչ անարդար, դա ավելի շատ հենց քաղաքական որոշում էր։ Այս մասին «Փաստինֆո»-ի հետ զրույցում ասաց էներգետիկ հարցերով փորձագետ Արմեն Մանվելյանն՝ ընդգծելով, որ վերջին տարիներին Իրանը բավական ակտիվ համագործակցում էր ՄԱԳԱՏԷ-ի հետ։

«Որոշակիորեն այդ համագործակցությունը սառել էր՝ պայմանավորված Իրան-Իսրայել հակասության հետ, քանի որ Իսրայելը սպառնում էր հարվածել Իրանի միջուկային կենտրոններին։ Սա առիթ դարձավ, որպեսզի ՄԱԳԱՏԷ-ն պատժամիջոցներ կիրառի, ինչն, ըստ իս, արդար չէր, քանի որ Իրանը երբեք չի մերժել համագործակցությունը՝ բացառությամբ վերջին շրջանի։ Կարծում եմ, այդ որոշումը կայացրել է ԱՄՆ-ը, ամենայն հավանակությամբ՝ Իսրայելի ճնշման ներքո»,-ասաց նա ընդգծելով, որ սա հիմք դարձավ այն բանի, որ Իրանը հայտարարի ուրանի հարստացման գործընթացը վերսկսելու մասին։

«Թե որքան հեռուն կգնա Իրանը՝ դժվար է ասել, բայց որպեսզի հասկանալի լինի, պետք է ասել, որ Իրանը ուրանը հարստացրել է 60 տոկոսով, որպեսզի այն որպես միջուկային զենք օգտագործվի՝ ուրանը պետք է հարստացվի 90 տոկոսով։ Սկզբունքորեն, Իրանը այնքան էլ հեռու չէ եւ եթե գործընթացը շարունակվի, ապա հաջորդ տարի Իրանը կունենա հարստացված ուրան, որը կարող են օգտագործել միջուկային զենքի համար»,- նշեց փորձագետը»։

Նա նաև հիշեցրեց, որ, օրինակ, ատոմակայանների համար օգտագործվող ուրանը հարստացված է ընդամենը 5 տոկոսով։

«Իհարկե, 90 տոկոսանոց ուրան ունենալու դեպքում էլ դեռ չի նշանակում, որ այն կվերածվի զենքի, բայց զենքի ամենակարևոր բաղադրիչը՝ ուրանը, արդեն կունենան, իսկ մյուս բաղադրիչներն ունենալը շատ ավելի հեշտ է, քան հարստացված ուրանը»։

Հիշեցնենք, որ ի պատասխան ՄԱԳԱՏԷ-ի որոշման՝ Իրանը հայտարարել է ուրանի հարստացման գործընթացը նոր թափով վերսկսելու մասին։

Աղբյուր` Փաստինֆո