Փաստ ինֆո

Նիկոլ Փաշինյանը կառավարության նիստում իրավապահ համակարգի ներկայացուցիչներին խիստ քննադատության ենթարկելուց հետո՝ իր վերջին հարցազրույցում հետքայլ արեց։ Հանրային հեռուստաընկերությանը տված հարցազրույցում նա աշխատանքից ազատված ուժային կառույցների պաշտոնյաների նկատմամբ այլևս ոչ մի քննադատություն չհնչեցրեց, հակառակը, Փաշինյանը նրանց վերագրեց «համակարգաստեղծ» լինելու հանգամանքը։ Հատկանշական էր, որ դեռ Ազգային Ժողովում Հովիկ Աղաարյանի հետ վեճի ընթացքում Արգիշտի Քյարամյանը ոչ միանշանակ ակնարկեց այն մասին, որ տարբեր պաշտոնյաներ իրեն դիմում են տարբեր հարցերով։

Հարցին, թե ինչով կարող է պայմանավորված լինել այս հետքայլը «Փաստինֆոյի» հետ զրույցում քաղտեխնելեգ Արմեն Բադալյանն ասաց, որ իր գնահատմամբ ոչ մի հետքայլ էլ չկար։ «Օրակարգ լցնելու խնդիր է լուծում, տեղ կա՝ նախընտրական քարոզարշավ է, տեղ կա հետընտրական, որտեղ, ինչ պետք է՝ այդ էլ ասում է, որևէ տրամաբանություն փնտրել պետք չէ։
Իր մնացած օրակարգերը ձախողված են, խաղաղության պայմանագիրը չի կնքվում, տնտեսական որևէ նվաճում չկա, ինչ որ բան պետք է ասի՝ սա է ասում»,- նշեց Բադալյանը։

Դիտարկմանը, թե հնարավոր է, որ հրաժարականներ ներկայացրած պաշտոնյաներն էլ իրենց հերթին կարող էին փակ դռների հետևում ոչ միանշանակ ակնարկներ արած լինեն համակարգային կոռուպցիայի առկայության շուրջ՝ Բադալյանը նշեց, որ հավանական է, որ դրա արդյունքում էլ մի մասը նոր պաշտոնի նշանակվեն, բայց ամեն դեպքում՝ այս գործողության մեջ տրամաբանություն փնտրել պետք չէ։ «Ըստ օդում կախված լուրերի՝ ՆԳ նախարարին ազատել են միայն նրա համար, որ խոշոր գործարարներից մեկի որդին կարողացել է ՀՀ-ից գնալ՝ խաղատանը «դեբոշ» սարքելուց հետ, և միայն հեռանալուց հետո են նրա նկատմամբ հետախուզում հայտարարել, իբրև թե սա զայրացրել է վարչապետին, բայց այդ հանցանքը ոչ 2024 թ-ի, ոչ էլ 2018 թ-ից հետո թիվ մեկ հանցանքը չէր, առավել ևս այս նախարարի օրոք կատարված ամենամեծ հանցանքը չէր։ Ինչ -որ մի բանով պետք է եթերը լցնել՝ նա էլ սրանով լցրեց»։

Նրա դիտարկմամբ՝ Փաշինյանը փորձում է նաև ներխմբային հարցեր լուծել, դիրքեր ամրապնդել։ «ՔՊ-ի ներսում էլ խմբավորումներ կան, արդեն ակնհայտ է, մեկը ՝ մեկի դեմ ինչ -որ գործողություններ են արվում, սա հաշվի առնելով՝ մեկի դիրքն է ուժեղացնում, հետո մյուսինը թուլացնում, ապա փորձում հավասարակշռել իրավիճակը նաև ներսում։ Դե, ի վերջո, մի բանով պետք է զբաղվի չէ՞, տնտեսություն չկա, անվտանգային համակարգը զրոյացվել է, բայց դե, ի վերջո, վարչապետ է, մի բանով պետք է զբաղվի չէ»։

Աղբյուր` Փաստինֆո