Փաստ ինֆո

Արցախի Հանրապետության քաղաքացիներն, ովքեր ունեին կենսաթոշակային խնայողություններ՝ հայտնվել են ծանր սոցիալ- տնտեսական իրավիճակում, մարդկանց մեծամասնության համար հույսը այդ խնայված գումարներն են։ Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արթուր Խաչատրյանն՝ անդրադառնալով այս խնդրի առնչությամբ արցախցիների՝ ՍԴ դիմումներին։

«Ինչու հանկարծ ՀՀ իշխանությունները արցախցիների գումարները որոշեցին խլել և օգտագործել ըստ իրենց հայեցողության, եթե իրենք Արցախի քաղաքացիներին ավտոմատ բերում են ՀՀ քաղաքացու ռեժիմի, ապա ինչու բոլոր հարցերում այդքան հետևողական չեն։ Թող բոլորին միանգամից առաջարկեն ՀՀ քաղաքացիություն, հետո ասեին՝ ով ուզում է՝ կարող է հրաժարվել։ Բայց այդպես չեն անում։ Հիմա մարդկանց խնայողությունները առանց իրենց հարցնելու փողը ձեռքից խլում են՝ ասում են, ներդնում են այսինչ հաշիվների վրա՝ ենթադրելով, թե իրենք ավելի լավ են հասկանում, թե իրենք ինչ կարիքներ ունեն հիմա և ինչ կարիքներ են ունենալու հետագայում»,-ասաց նա։

Նա հիշեցրեց, որ կուտակային կենսաթոշակային համակարգի ներդրման հիմնական հիմնավորումը տնտեսությանը երկարաժակմետ փողով ապահովելն էր, մինչդեռ հիմա, գումարների 65 տոկոսը որ մնում է Հայաստանում՝ հիմնականում պարտատոմսերի մեջ է և ավանդների։ «Բայց այդ ավանդների մեջ քաղաքացին ինքը կարող է ներդրումներ անել, այդ դեպքում ինչու պետք է փողը տա ինչ որ հիմնադրամի, որ այդ հիմնադրամը դրա վրա փող աշխատի ու ավանդների մեջ ներդրումներ անի, ցանկացած քաղաքացի կարող է ավանդների մեջ ներդրում անել։ Նույնը պետական պարտատոմսերի դեպքում։ Ստացվում է՝ պետությունը ֆինանսավորում է փող է տալիս ձրի, հետո նորից գնում պարտքով փող էվերցնում»։

Աղբյուր` Փաստինֆո