Փաստ ինֆո

«Քաղաքացիական պայմանագիրը» փորձում է վիժեցնել Գյումրու ավագանու ընտրությունները։ Այս մասին «Փաստինֆոյի» հետ զրույցում ասաց ԱԺ նախկին պատգամավոր, իրավաբան Գևորգ Պետրոսյանը։

Նրա դիտարկմամբ՝ «Քաղաքացիական պայմանագրում» չունեն պատշաճ թեկնածու և ահաբեկված են այն մտավախությունից, որ Վարդան Ղուկասյանը լուրջ հայտ է ներկայացնելու։

«Ըստ շրջանառվող լուրերի՝ իրենք ևս մեկ թեկնածու են ունեցել իգական սեռի ներկայացուցիչ, ով մերժել է իրեն առաջադրելու առաջարկը, և հիմա ՔՊ-ն թեկնածուի փնտրտուքի մեջ են։ Քանի որ չունեն պատշաճ թեկնածու՝ վախենում են գնալ այդ քայլին ու ընտրությունների օր նշանակեն։

Ավելին, ես վստահաբար կարող եմ ասել, որ եթե իշխանությունն ունենար արժանի թեկնածու՝ մեկ օր առաջ կկազմակերպեր այդ ընտրությունները։ Իրենք շատ լավ հասկանում են, որ իրենց վարկանիշն օր օրի նվազում է։ Թե Երևանի ավագանու, թե Վանաձորի ավագանու, թե Ալավերդիի ավագանու ընտրությունների արդյունքներից էլ իրենք կարող են եզրակացնել, որ որքան ուշանան ընտրությունները՝ այնքան իրենց վարկանիշն ավելի ցածր է լինելու և իրենց հաղթելու շանսերն այնքան փոքրանում են։ Հետևապես, իրենք իսկապես չունե արժանավոր թեկնածու»,- արձանագրեց Գ.Պետրոսյանը։

Դիտարկմանը, թե Կարեն Սարուխանյանը հրապարակել էր թմրանյութերի թեստի արդյունքները, ըստ որոնց դրանք բացասական արդյունք են տվել՝ Պետրոսյանն արձագանքեց՝ նշելով, որ հարգելով նրա անմեղության կանխավարկածը՝ պնդում է, որ եթե վստահ լինեին, որ նա արժանի թեկնածու է ու կապահովի իրեն վստահած քաղաքական ուժի վստահությունը՝ կդնեին նրա թեկնածությունը։ Ակնհայտ է, որ իշխանությունը կասկածում է նրա հաջողությանը, ուստիեւ, ինչպես նշեց բանախոսը, մտադիր են հետաձգել ընտրությունները, մինչև մյուս տարի՝ մինչև հավանական ողջամիտ թեկնածուի փնտրտուքի ավարտը։

«Այսօր Գյումրի քաղաքը քաղաքական իմաստով անտեր է մնացել, իշխանությունը, ըստ տրամաբանության՝ պետք է օր առաջ շահագրգիռ լինի տեղական ընտրություններ կազմակերպել ու իր թեկնածուն առաջադրել, որն իրապես կկարողանա համայնքային խնդիրներ առաջադրել ու լուծել դրանք։ Եթե իրենք ունենային նման թեկնածու կամ թեկնածուներ, ապա օր առաջ, խախտելով բոլոր հնարավոր օրենքները, կգնային ընտրությունները։

Սա նույնն է, եթե ֆուտբոլային թիմ լինի, որը բացարձակ վստահ լիներ իր հաղթանայի վրա, բայց խաղադաշտ դուրս չգա, դա տրամաբանություն չունի։ Հատկապես, որ այս իշխանությունը կանգնած է խարխլված դիրքերը ամրապնդելու օրհասական անհրաժեշտության առաջ»,-ընդգծեց Պետրոսյանը։

Աղբյուր` Փաստինֆո