Փաստ ինֆո

«Փաստինֆոն» այսօր հրապարակել էր Երևանի բնակիչներից մեկի ահազանգն, ըստ որի՝ քաղաքապետարանի աշխատակիցները քաղաքացուն բռնի ուժով իջեցրել էին ավտոբուսից 100 դրամանոց չունենալու պատճառով, քաղաքացին նաև նշում էր, որ կանգառը, որտեղից ինքն օգտվում է տրանսպորտից՝ TelCell-ի ապարատը կտրոն չի տալիս։

Մենք պարզաբանում էինք խնդրել Երևանի քաղաքապետարանից, քաղաքապետարանի աշխատակազմի լրատվության վարչությունից դեպքի առնչությամբ մեզ վստահեցրին, որ քաղաքացին ինքն է կոնֆլիկտ հրահրել։

«Ավտոբուսում գտնվող մեր հասարակական կարգած ծառայողները հայտնում են, որ քաղաքացին բարձրացել է ավտոբուս ու գումար է առաջարկել վարորդին, նա էլ հրաժարվել է վերցնել։ Մեր աշխատակիցները ընկերական առաջարկել են 100 դրամ տալ քաղաքացուն, որպեսզի ինքը վճարելու հնարավորություն ունենա, նա մերժել է, ուղևորներից մեկն էլ առաջարկել է քաղաքացու մոտ եղած 500 դրամանոցը մանրել, որտեղ նաև 100 դրամանոց կլինի, սակայն նա բավական կոպիտ կերպով մերժել է։ Երբ ավտոբուսում աղմուկ է սկսվել, վարորդը կանգնել է ու հրաժարվել է վարել մեքենան, ասել է՝ կամ վճարումն արա կամ իրավիճակը պետք է ինչ-որ կերպ հանգուցալուծվի։ Քաղաքացին էլ ասել է՝ թե իրեն ոչինչ չի հետաքրքրում՝ վարորդը կարող է իր գումարը մանրել»,- հայտնեցին քաղաքապետարանից՝ վստահեցնելով որ որևէ ֆիզիկական ներգործություն քաղաքացու վրա չի եղել և բռնություն չի գործադրվել։ Միայն հորդոր է հնչել է՝ իջնելու կամ վճարելու։ «Բացառվում է, որ բռնություն գործադրված լինի քաղաքացու վրա»,-ասացին քաղաքապետարանից։

Վահագն Մկրտչյանը այս նկարագրության վերաբերյալ իր պարզաբանումը ներկայացրեց, վստահեցնելով, որ քաղաքապետարանի աշխատակիցները իր գումարը չեն մանրել։

«Այո, մի աղջնակ առաջարկեց իմ փոխարեն վճարել, բայց ես ինչո՞ւ պետք է ուրիշի գումարը վերցնեմ, երբ ես ունեմ գումար։ Ես չեմ հրահրել և նրանք բռնի ուժով ինձ ավտոբուսից դուրս հրեցին, եթե հրաշքով տեսաձայնագրությունները չկորեն պարզ կերևա, որ ձեռքս էլ մնացել է փակված դռների արանքում։ Մնացածը կպարզաբանեմ ոստիկանների հետ զրույցից հետո»,-ասաց Մկրտչյանը։

Քաղաքապետարանից նաև հետաքրքրվեցին, թե արդյոք իրենց ծառայակիցները ունե՞ն հրահանգ իջեցնել ավտոբուսից ուղեվարձը չվճարած քաղաքացիներին.

«Բացառվում է, նրանք մոնիթորիգ են անում, որպեսզի հասկանանք, թե քանի հոգի է երթևեկում առանց վճարելու»։

Ինչ մնում է տեսագրությանը՝ քաղաքապետարանից հայտնեցին, որ այն հրապարակման ենթակա չէ։ «Ոստիկանությանը տեսագրությունը տրամադրելու մասին ոչինչ ասել չեմ կարող, կարծեմ, փաստաբանի օրինական դիմում հիման վրա են տեսագրություն տրամադրում»,-հայտնեցին քաղաքապետարանից։

Հ.Գ. Մեր նյութն արդեն պատրաստ էր հրապարակման, երբ մեզ հետ կրկին կապ հաստատեցին քաղաքապետարանից և հայտնեցին, որ TelCell-ի գործընկերները հավաստիացնում են, որ այսօր Երևան քաղաքում որևէ չաշխատող ապարատ չի եղել։ Այն հասցեում տեղադրված տերմինալը, որի մասին հիշատակել է քաղաքացին, խափանվել է երկուշաբթի օրը՝ կարճ ժամանակահատվածում։

Աղբյուր` Փաստինֆո