Փաստ ինֆո

Իմ ունեցած վերջին տվյալներով՝ որևէ բան չի փոխվել ու Կարեն Սարուխանյանը շարունակում է մնալ Գյումրիում ՔՊ-ի քաղաքապետի թեկնածուն, ես, գոնե, հակառակի մասին տեղեկություն չունեմ։ Այս մասին «Փաստինֆոյի» հետ զրույցում ասաց «Քաղաքացիական պայմանագիր» խմբակցության գյումրեցի պատգամավոր Էմմա Պալյան՝ անդրադառնալով «Փաստինֆոյի» հարցին, թե թմրանութերի թեստ հանձնելու ու դրա դրական պատասխանից հետո՝ արդյոք Գյումրիում ՔՊ-ի քաղաքապետի թեկնածուն շարունակում է մնալ Կարեն Սարուխանյանը։

«Հազար ու մի հրապարակում կարող է լինել մամուլում, որոնց մի մասը չեն համապատասխանում իրականությանը, սա առաջին դեպքը չէ, այնպես որ, թույլ տվեք մամուլի հրապարակումները չմեկնաբանեմ»։

Հարցին, թե կարո՞ղ է հերքել, որ Նիկոլ Փաշինյանը Սարուխանյանից, ու ոչ միայն նրանից, պահանջել է արյան մեջ թմրամիջոցների առկայության թեստ հանձնել՝ Պալյանն ասաց, որ նման ինֆորմացիա չունի։

Պատգամավորը՝ որպես գյումրեցի, կարծում է, որ Սարուխանյանի անձի շուրջ որևէ բացասական մթնոլորտ կամ ձևավորված կարծիք չկա։ «Արշավ է սկսվել լրատվամիջոցներում պարոն Սարուխանյանին վարկաբեկելու համար, սակայն վստահեցնում եմ, որ այն գյումրեցին, որ ճանաչում է պարոն Սարուխանյանին, հասկանում է, որ սա հենց պարոն Սարուխանյանին, նրա կատարած աշխատանքը վարկաբեկելու համար է արվում, բայց պարոն Սարուխանյանը գյումրեցիների համար ընդունված անձ է, ընդունված կերպար է ու նա նաև Շիրակում ՔՊ-ի ողնաշարն է, այսինքն, հենց իր շուրջ են հավաքվել կուսակցականներ, որոնք նույն գաղափարն են կիսում, այնպես որ պարոն Սարուխանյանը Գյումրիում ընդունված անձ է, ու այդ վատ արշավը որքան էլ շարունակվի լրատվականով ու բոլոր հնարավոր միջոցներով, դա չի փոխելու Սարուխանյանին ճանաչող անձանց կարծիքը»։

Դիտարկմանը, թե գյումրեցիներից շատերը պնդում են, որ Սարուխանյանը ամենավատ թեկնածուն էր, որին կարող էր ընտրել ՔՊ-ն՝ Պալյանը պնդեց, թե ծնվել- մեծացել է Գյումրիում, հիմա էլ շարունակում է ապրել, ու վստահ է որ այդ կարծիքները եզակի են։ «Բնականաբար, եթե մարդը որոշակի գործունեություն է ծավալում՝ կլինեն նաև դժգոհ մարդիկ, սա բնական է, ինչ մնում է այն բանին, որ դժգոհ մասսան ավելի շատ է, քան նրա ընդունող ու գնահատող մարդիկ՝ թույլ տվեք գոնե ես չհամաձայնեմ»։

Աղբյուր` Փաստինֆո