Փաստ ինֆո

Բրյուսովի շենքի օտարման մասին խոսակցությունների մակարդակով եմ լսել, բայց զարմանալի ոչինչ չկա, մարդը երեկ մանկավարժական համալսարանում ուսանողներին ու դասախոսներին հավաքել էր, որ ասեր՝ Ակադեմիական քաղաք ենք կառուցում, բոլորին տեղափոխելու ենք, հետևապես ինձ համար զարմանալի չէ, որ ցանկանում են շենքն օտարել։ Այս մասին «Փաստինֆոյի» հետ զրույցում ասաց Վլ. Բրյուսովի անվան համալսարանի նախկին պրոռեկտոր Ցոլակ Ակոպյանը։

«Այլ հարց է, որ այդ Ակադեմիական քաղաքը դեռ չկա։ Ավելին, ես ուղիղ մեկ ամիս առաջ եղել եմ այն տարածքում, որտեղ ծրագրում են կառուցել Ակադեմիական քաղաքը, ոչ մի շինություն, ոչինչ արված չէ, ու հիմա այդ մարդիկ խոսում են այն մասին, որ 2027 թ-ին կունենան Ակադեմիական քաղաք։ Ես բացառում եմ, որ իրենց ասած ժամկետում կարողանան հասցնել անել այն, ինչի մասին խոսում են։

Հետևաբար, աբսուրդ է խոսել բուհերի շենքերի օտարման մասին, այն դեպքում, երբ այն վայրը, ուր պատրաստվում են բուհը տեղափոխել՝ չկա։ Ակնհայտ է, որ այդ ծրագիրը ոչ թե կրթության զարգացման շուրջ է կառուցված, այլ կոնկրետ շահ ունեն ու ծրագրեր ունեն այդ շենքերի հետ կապված»,- նշեց պարոն Ակոպյանը։

Անդրադառնալով Բրյուսովի, մանկավարժականի ու ֆիզկուլտինտիտուտի միավորմանը՝ նա ընդգծեց, որ սա որևէ տրամաբանության մեջ չի կարող տեղավորվել։ «Ավելին, Բրյուսովի ծրագրերի 85 տոկոսը, որոնք այսօր իրականացվում են, կրթական գիտության հետ կապ չունի, մնացած 15 տոկոսի պատճառով այդ բուհը փակում են ու միավորում մանկավարժականի հետ։ Ընդ որում, որևէ կրթական ծրագիր չկա։ Օրինակ, մարդն ընդունվել է Բրյուսովի քաղաքագիտության բաժին, ի՞նչ է լինելու այդ բաժնի հետ...Մարդիկ ակադեմիական քաղաք են կառուցում ու կրթական ծրագիր չունեն, դրա համար էլ պնդում եմ՝ մեր այսօրվա կրթության նախարարը չարիք է, նա անվտանգության լուրջ սպառնալիք է»։

Ակոպյանը նաև նշեց, որ վստահ է, որ ուսանողությունը այս որոշման դեմ պայքարելու է։ «Ուսանողությունը բավական բացասական է տամադրված, նաև ուսանողների գրառումներից, ակտիվությունից ակնհայտ է, որ ուսանողների մոտ պայքարելու մոտիվացիա կա, ու այդքան հեշտ չի լինելու նրանց այդ շենքերից հանելը»։

Ինչ վերաբերում է դասախասական կազմին, ապա նրա կարծիքով, Դավիթ Գյուրջինյանը դասախոական կազմին հիմնականում գլխատէլ է, 80 հոգու ազատել է աշխատանքից անցած 2 տարիների ընթացքում։ «Այսինքն, այն մարդիկ, որոնք ընդդիմադիր էին իրենց հայացքներով, չէին ողջունում այն փոփոխությունները, որոնք Բրյուսովում իրականացվում են, աշխատանքից ազատվել են։ Շատ քչերն են իմ նման գնացել դատական ճանապարհով, հիմնական այն խումբը, որոնք ակտիվ էին՝ նրանց մեկուսացրել են։ Այնուամենայնիվ, այսօրվա դասախոսական կազմի մեջ էլ կան մարդիկ, ովքեր ընդդիմանում են, կան մարդիկ, ովքեր խոսում են, բայց պատերի տակ, դրանով նպաստում են իրենց բուհի վերացմանը, կան նաև մարդիկ, ովքեր դեռ հավատում են, որ այս իշխանությունը իրենց ու կրթական համակարգը փրկելու են։ Հուսամ՝ մի օր նրանց աչքերն էլ կբացվի»,- եզրափակեց Ցոլակ Ակոպյանը։

Աղբյուր` Փաստինֆո