Փաստ ինֆո

Կիրակնօրյա պաշտոնանկությունները Ն․ Փաշինյանի հախուռն աշխատելաոճի դրսևորումներ էին, որից պետք չէ զարմանալ։ Գլոբալ առումով կապ չունի, թե ով, ինչ պաշտոն է զբաղեցնում։ Պետական համակարգ գոյություն չունի և մենք վաղուց ունենք մեկ անձի բացարձակ իշխանություն։ «ՓաստԻնֆոյի» եթերում ասել է ՀՀԿ գործադիր մարմնի անդամ Էդուարդ Շարմազանովը։

Բանախոսի դիտարկմամբ, պաշտոնանկությունների պատճառի երկու տարբերակ կա, որոնցից մեկի համաձայն պաշտոնանկությունները Ն․ Փաշինյանի անձնական որոշումը չեն եղել՝ համապատասխան արևմտյան կենտրոններից, եթե ոչ դեսպանատներից նույն կերպ What’s App-ով ստացած հաղորդագրություն են։ Եվ, ինչպես ինքն է ստացել՝ այնպես էլ ուղարկել է հասցեատերերին։ Կարծիք կա, որ մեկ ժամ առաջ Ն․ Փաշինյանն էլ չգիտեր, որ պետք է հեռացնի այդ մարդկանց։ Ն․ Փաշինյանը ունեցել է ընդամենը փոխանցողի դերակատարում։

Մեկ այլ կարծիքի համաձայն, հեղափոխությունը մտնում է «յակոբինյան» փուլ, որը ասոցացվում է ամենածայրահեղ տեռորի հետ։ Ինչպես Հին Հռոմում էին ասում՝ «Հասարակությանը պետք են տեսարաններ և հաց»։ Հաց չի կարողանում ապահովել՝ կան տնտեսական և սոցիալական խնդիրներ, ուստի պետք է տեսարաններով ապահովի։ Ըստ կարծիքի, պաշտոններից հեռացվում են մարդիկ, որոնք որոշակի կապ կամ վստահություն են ունեցել Հյուսիսի հետ, ավելի քիչ վստահելի են Արևմուտքի համար, և կնշանակվեն մարդիկ, որոնք ավելի վստահելի են Արևմուտքի համար։

Ըստ փորձագետի, կտրուկ տեսարանների գնալու ևս մեկ պատճառ կա․ Ն․ Փաշինյանը և իր ողջ քաղաքական թիմը հասարակությանը կերակրում էր «խաղաղության պայմանագրի» շուտափույթ ստորագրման հեռանկարով։ Փաստացի, «խաղաղության պայմանագրի»՝ Ն․ Փաշինյանի օրակարգը պարտվել է։ Ն․ Փաշինյանը փորձում է իր ձախողումը կադրային մի քանի փոփոխությամբ վերցնի իր ձեռքը, արտաքին տեսքը փոխի և ցույց տա, որ ինքը նոր հեղափոխական է։ Իսկ ժողովրդի հիշողությունը 24 ժամ է և Ն․ Փաշինյանը գիտի դա։ Իսկ երբ ակտիվանում է ընդդիմությունը՝ Ն․ Փաշինյանը և իր ամբողջ թիմը ժամանակ և հնարավորություն չեն ունենում իրագործելու իրենց հակազգային ծրագրերը։

Մանրամասները՝ տեսանյութում։

Աղբյուր` Փաստինֆո