Փաստ ինֆո

Մոնղոլական կայսրության ժամանակ աղունիկ էին ուղարկում՝ նման լուրեր հաղորդելով, հիմա՝ Հայաստանում բավականին առաջխաղացում կա այդ առումով, օգտագործում են համացանցը։ Հայաստանում գործում է խանական կառավարման մոդելը, սրանով ամեն ինչ բացատրվում է։ Ոչ ոք ոչ մեկին ոչինչ չպետք է էլ բացատրի, քանի որ կա ղեկավարի կամքը, մյուսները պետք է հնազանդ դա կատարեն։ Կուզի՝ «սմս»-ով կուղարկի, կուզի՝ էշի վրա մեկին կնստացնի, նամակը կտա ձեռքը՝ կուղարկի լուրն այդպես։ Ինչպես կուզի, այնպես էլ՝ կվարվի։ Այս մասին «Փաստինֆո»-ի հետ զրույցում ասաց փաստաբան Երվանդ Վարոսյանը՝ անդրադառնալով իրավապահ մարմինների ղեկավարներին «սմս»-ով պարտադրված հրաժարականներին։

Հիշեցնենք, որ նոյեմբերի 17-ին՝ կիրակի օրը, ուշ գիշերին հայտնի դարձավ հրաժարականների շքերթի մասին։ Մասնավորապես, հրաժարականի դիմումներ են ներկայացրել ՀԿԿ նախագահ Սասուն Խաչատրյանը, ՔԿ նախագահ Արգիշտի Քյարամյանը, ՆԳՆ նախարար Վահե Ղազարյանը, ՊԵԿ նախագահ Ռուստամ Բադասյանը, ՏԿԵ նախագահ Գնել Սանոսյանը, ինչպես նաև՝ ԲԴԽ նախագահ Կարեն Անդրեասյանը։ Նիկոլ Փաշինյանն ինքը հայտարարություն էր տարածել՝ հայտնելով, թե որոշ բարձրաստիճան պաշտոնյաների խնդրել է թողնել իրենց զբաղեցրած պաշտոնները։ Ընդ որում, ինչպես պարզվել է, Նիկոլ Փաշինյանը պաշտոնյաներին պաշտոնից ազատման մասին «խնդրանքը» ուղարկել է «վոթսափ» հավելվածի միջոցով՝ «սմս»-ով։ Հրաժարական տված պաշտոյաների հայտարարությունների համաձայն՝ վերջիններս համաձայն չեն եղել դժգոհությունների հետ, այդուհանդերձ, հրաժարական են տվել։ Բացի այդ, թեև Փաշինյանի «դժգոհությունները» եղել են իրավապահ մարմիններից, բայց ՀՀ գլխավոր դատախազ Աննա Վարդապետյանի նկատմամբ այդ դժգոհությունները չեն տարածվել, թեև հենց դատախազությունն է այլևս քրեական հետապնդում հարուցող մարմինը։

«Ուրեմն՝ գոհ է Աննա Վարդապետյանի աշխատանքից, ուրեմն բավարարում է այն, ինչ անում է Աննա Վարդապետյանը։ Մյուսներինը, գուցե, ինչ-որ տեղ չի բավարարել։ Թե ինչու չի բավարարել՝ չեմ կարող հասկանալ, որովհետև կարծես թե ամեն ինչ էլ անում էին, չեմ պատկերացնում նման բան, որ ցանկացել է՝ չեն արել, բայց երևի սիրտն ավելին է ուզում, իրենք չեն հասկացել, որ ուզում է»,- ասաց Վարոսյանը՝ նշելով, որ հնարավոր է՝ դատախազությունը կարողացել է համոզել, որ եթե ինչ-որ բան չի ստացվում, որովհետև նախաքննություն իրականացնողները, կատարողները թերացել են։

Հարցին՝ ինչ փոխվեց Փաշինյանի դիրքորոշման մեջ, ավելի վաղ՝ ակցիաների ժամանակ հայտարարում էր՝ պետություն է, ոստիկանությունն ուժ գործադրելու իրավունք ունի, ուրբաթ օրն էլ՝ խոսում էր ուժի կիրառման սահմանների մասին, ի վերջո՝ ինքը փոխվեց, թե փորձում է՞ ընդդիմադիր անձանց վրա էլ աշխատել՝ Վարոսյանը պատասխանեց՝ նշելով․ «Իր հայտարարությունները երբեք չեն նշանակում, որ ինքն այդպես է կարծում, որ հետո էլ ենթադրենք, թե ինչու է կարծիքը փոխել։ Ոչ առաջինն է իր կարծիքը, ոչ՝ երկրորդը՝ արտահայտածից։ Նա, ըստ հարմարության, քաղաքական կոնյուկտուրայից ելնելով, անում է քայլեր։ Այդ քայլերի մեջ նաև իր հայտարարություններն են, ինքն ըստ հարմարության է ամեն ինչ անում։ Հիմա՝ պետք էր նրան դժգոհել՝ դժգոհեց, վաղը՝ քաղաքական կոնյուկտուրայի տեսանկյունից ձեռնտու կլինի՝ գոհ լինել իրավապահ համակարգից, կասի՝ գոհ է։ Սա է խնդիրը։ Այս պահին իր գծած պլանում՝ հերթը հասել է դժգոհելուն, նա հիմա կամաց-կամաց ընդդիմություն է դառնում, սափրված Նիկոլ Փաշինյանը դառնում է՝ մինչև սափրվելը Նիկոլ Փաշինյանին ընդդիմություն»։

Իսկ թե հնարավոր է արդյոք, որ միջազգային կառույցներից կամ այլ շրջանակներից էլ ճնշումներ լինեն, օրինակ, Վահե Ղազարյանի վերաբերյալ, Վարոսյանը նշեց՝ չի կարող ասել, տեղացի ազդեցության գործակալները վաղուց այդ թեման բարձրացնում են, բայց ասել, որ Նիկոլ Փաշինյանին հետաքրքրում է ճնշումները՝ չի կարծում, նա ավելի շատ միտված է իշխանությունը պահելուն, այդ ճանապարհին էլ ինչ քայլեր պետք է՝ դա էլ ձեռնարկում է։

«Միջազգային հանրության՝ արևմուտքի աչքի առաջ չէ՞ այս խանական կառավարման մոդելը ծաղկում, արևմուտքի դեսպանները չե՞ն տեսնում այդ «սմս»-ները, չե՞ն տեսնում անկախ դատական համակարգի «հրաժարականը», տեսնու՞մ են, չէ՞ այդ ամեն ինչը, բայց լռում են։ Այդ լռելն ունի գին, որն ավելի բարձր է, քան՝ Վահե Ղազարյանը կշարունակի պաշտոնավարել, թե՝ ոչ։ Որ պահին նա այդ գինը չվճարի արևմուտքին, արևմուտքը կսկսի այդ խանական կառավարման մոդելը դրոշակի պես իր քթի տակ պարբերաբար թափահարել»,- նշեց նա։

Հեղինակ՝ Իզաբել Սահակյան

Աղբյուր` Փաստինֆո