Փաստ ինֆո

«Փաստինֆոյի» տեղեկություններով՝ ՔՊ-ական պատգամավոր Հովիկ Աղազարյանն այս պահին որոշ տարաձայնություններ ունի ԱԺ նախագահ Ալեն Սիմոնյանի հետ։ Նրանից պահանջել են վայր դնել մանդատը, ինչի հետ նա համաձայն չէ, ավելին՝ չի բացառել «Քաղաքացիական պայմանագիր» խմբակցությունից դուրս գալն ու որպես անկախ պատգամավոր շարունակել իր գործունեությունը խորհրդարանում։

Հարցի առնչությամբ փորձեցինք մեկնաբանություն ստանալ Աղազարյանից։ Վերջինս ոչ հերքեց, ոչ էլ հաստատեց մեր ունեցած տեղեկությունը։ «Մանդատ դնելու պահանջ չի հնչել, ես սպասում եմ իմ նկատմամբ կուսակցությունում հարուցված կարգապահական վարույթի քննությանը։ Ինչ վերաբերում է խմբակցությունից դուրս գալուն՝ ես այդ հարցին չեմ կարող պատասխանել»,- նշել է պատգամավորը։

Ըստ նրա՝ վարույթը քննարկելու մի քանի փուլ կա. «վարչությունը վերջին ինստանցիան է, նախ վերստուգող հանձնաժողովը քննարկում է այդ հարցը, արդյունքների մասին զեկուցում վարչությանը, վարչությունն էլ քննարկում ու որոշում է կայացնում»։

Նա նշեց, որ վարույթի արդյունքներն արդեն պետք է ուղարկեն վարչություն։ «Թե երբ է վարչությունը քննարկելու մր նկատմամբ հարուցված վարույթը՝ տեղյակ չեմ»,- վստահեցրեց Աղազարյանը։

Աղբյուր` Փաստինֆո