Փաստ ինֆո

Կարծում եմ՝ պաշտոնանկությունների այս շքերթը նախընտրական է ու Նիկոլ Փաշինյանը պատրաստվում է ընտրությունների՝ չգիտեմ հերթական, թե արտահերթ։ Քանի որ հասկացել է, որ հասարակության համբերության բաժակը լցվել է՝ նա փորձում է ցույց տալ, որ ինքը ժողովրդի կողքին է։ Այս մասին «Փաստինֆոյի» հետ զրույցում ասաց քաղաքական վերլուծաբան Արմեն Բաղդասարյանն՝ անդրադառնալով այսօր տեղի ունեցած մի շարք պաշտոնակություններին։ «Փաշինյանը փորձում է ցույց տալ, որ ժողովրդի հետ է, ոչ թե չինովնիկների, դրա համար փորձում է նրանց զոհաբերելով փրկել իր վարկանիշը։ Կարծում եմ, հիմնական մոտիվը սա է»։

Դրտարկմանը, թե 6 տարի անց դժգոհություն իր իսկ կողմից նշանակած կադրերից չի՞ նշանակում, որ Փաշինյանը նաև խոստովանում է, որ ինքը վատ կառավարիչ է՝ Բաղդասարյանը նշեց, որ սա առաջին հերթին հենց սա է նշանակում։ «Խոսքը ոչ թե մեկ կառույցի ղեկավարի մասին է, այլ բազմաթիվ։ Եթե խոսք լիներ մեկի մասին՝ կարող էինք ասել, որ դե սխալվել է, բայց երբ խոսում ենք բազմաթիվ կառույցների ղեկավարների մասին՝ նշանակում է, որ հենց ինքը՝ Փաշինյանն է ձախողվել, ոչ թե իր նշանակած կադրերը։ Հետևապես, նաև ոչ մի երաշխիչ չկա, որ հաջոդիվ իր նշանակած կադրերը կրկին չեն ձախողելու։

«Ավելին, ես վստահ եմ, որ այդ պաշտոնյաներին փոխարինողները ոչնչով ավելի լավը չեն լինելու, հակառակը, շատ ավելի վատն են լինելու, քանի Նիկոլ Փաշինյանը նրանց ընտրում է ոչ թե ըստ նրանց պրոֆեսիոնալ որակների, այլ ըստ իրեն հավատարիմ լինելու աստիճանի, թե որքանով իրենք ավելի հավատարիմ կլինեն իրեն ու կանեն իր PR-ը։
Ընդ որում՝ ամենամտահոգիչն այստեղ այն է, որ երբ կառավարության նիստում Փաշինյանն ասում էր որ իր համբերության բաժակը լցվել է, ինքը չէր ասում, որ պաշտոնյաները ձախողել են, նա ասում էր, որ նրանց գործունեության արդյունքում տպավորություն է, որ ինքն է դրանց տակ ստորագրել։ Այսինքն, նա պարզ ասում էր, որ նրանց գործունեության արդյունքում տուժում է իր վարկանիշը։ Ստացվում է, որ իր համար ոչ թե պետական ինստիտուտների աշխատանքի արդյունքն էր կարևոր, այլ իր վարկանիշը, հետևաբար, նա խնդիրը հենց այդպես էլ ընկալում է խնդիրն այն է, որ պետական ինստիտուտները պետք է ծառայեն իր վարկանիշին, իր քաղաքական հեղինակությանը և իր քաղաքական շահերին։

Այսինքն, նա ինստիտուտները ընկալում է իր PR-ի մաս, նրանք իր PR-ը լավ չեն արել, դրա համար էլ ուղարկում է տուն»
Դիտարկմանը, թե արդարադատության նախարարի փնտրտուքը բավական երկար տևեց և դրանից պարզ դարձավ, որ իշխանությունները կադրերի խնդիր ունի՝ հիմա ո՞րն է երաշխիքը, որ իրավապահ համակարգում կգտնվեն մարդիկ, ովքեր կհամալրեն թափուր մնացած պաշտոնները՝ Բաղդասարյանն ասաց, որ Հայաստանում իրականում պրոֆեսիոնալ իրավաբանների խնդիր չկա։ Հայաստանում կան բազմաթիվ պրոֆեսօոնալ իրավաբաններ, խնդիրն այն է, ցանկացած բարձրաստիճան իրավաբան պաշտոնին նշանակվելով իրեն ընկալում է որպես Նիկոլ Փաշինյանի կամ գործող իշխանության վարձու աշխատող, Նիկոլ Փաշինյանը նրանց նշանակում է հենց այդ սկզբունքով դրա համար էլ բազմաթիվ պրոֆեսիոնալ իրավականներ մնում են համակարգից դուրս, իսկ իշխանության ցանկացած հլու-հնազանդ կատարողները մնում են պաշտոնի, սա մասնագիտական խնդիր չի, սա մարդկային որակի, սկզբունքայնության, քաղաքական ու քաղաքացիական գիտակցության հարց է»։

Աղբյուր` Փաստինֆո