Փաստ ինֆո

Իշխանությունը փորձում է նոր դեմքով ներկայանալ, ընտրությունները սարերի հետեւում չեն։ ԱԺ-ում այսօր տեղի ունեցած ճեպազրույցների ժամանակ նման դիտարկմամբ է հանդես եկել ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով հրաժարականներին։

Ինչպես արդեն հայտնել ենք՝ հրաժարականներ են տվել ոչ միայն գործադիրի անդամներ ՆԳ նախարար Վահե Ղազարյանը, տարածքային կառավարման ու ենթակառուցվածքների նախարար Գնել Սանոսյանը, ՊԵԿ նախագահ Ռուստամ Բադասյանը, այլեւ Սահմանադրությամբ անկախ համարվող դատական, քննչական մարմինների ղեկավարները՝ ԲԴԽ նախագահ Կարեն Անդրեասյանը, ՔԿ նախագահ Արգիշտի Քյարամյանը, ՀԿԿ նախագահ Սասուն Խաչատրյանը։

«Այս պաշտոնանկությունները ես ավելի շատ դիտարկում եմ ընտրական տրամաբանությունների ներքո։ Իհարկե, ուղիղ առումով չի առնչվում նրան, որ հնարավոր է 3 կամ 4 ամիս հետո ընտրական գործընթացներ լինեն, նույնիսկ հերթական ընտրությունները սարերի ետևում չեն և իշխանություն փորձում է նոր դեմքով հանդես գալ, փորձում են փաթեթավորել բոլոր այն խնդիրները, որ այս ընթացքում կուտակվել են, փորձում են հանդես գալ նոր դեմքով», - ասաց Աբրահամյանը։
Նա նույն կոնտեքստում գնահատեց նաև Փաշինյանի սափրվելու քայլը։

«Նույնիսկ խորհրդանշական առումով , այդ սափրվելը ևս այս ընդհանուր արարի մի մասն է , որևէ պատահական համընկում չկա, իմիջային առումով հնարավոր է իրեն որոշակի խորհուրդներ են տվել՝ իրացնում է։ Ինչ վերաբերում է ուժային բլոկին կամ արդարադատության համակարգին, ապա այս իշխանությունը 2018թ.-ից ի վեր բազմաթիվ խոստումներ է տրվել՝ սկսած ասֆալտին տապալելուց, մինչև մարդկանց անազատության ուղարկելը,բայց հանրությունը լրիվ այլ բանի է ականատես եղել ու մեղքը տարբեր անձանց կամ համակարգերի գրպանը գցելու անհրաժեշտություն է առաջացել», - ասաց Աբրահմյանը։

Աղբյուր` Փաստինֆո