Փաստ ինֆո

Արցախի ժողովրդի վերադարձի իրավունքի հետապնդման հիմնական խոչընդոտը զարմանալիորեն եղել է և շարունակում է մնալ ՀՀ կառավարությունը,այդ իրավունքի պաշտպանության բացակայությունը խարան է ՀՀ կառավարության խղճին։ Նման հայտարարությամբ հանդես եկել ՀՀ արտաքին գործերի նախկին նախարար Վարդան Օսկանյանը։

«Չնայած Արցախի ժողովրդի վերադարձի իրավունքի հստակ հումանիտար հարցին՝ Փաշինյանը միշտ խուսափել է այս հարցին անդրադառնալուց», - ասել է Օսկանյանը՝ ավելացնելով, որ Փաշինյանը պատճառաբանում է, թե արցախցիների վերադարձի պաշտպանությունը Հայաստանի շահերից չի բխում՝ առանց հիմնավորելու, թե ինչու։

«Փաշինյանի այս պնդումն անհասկալի, կասկածելի և շփոթեցնող է, քանի որ բազմաթիվ հիմնավոր փաստարկեր, հուշում են հակառակը», - ընդգծել է ՀՀ նախկին արտգործնախարար Վարդան Օսկանյանը:

Դիվանագետն արձանագրել է, որ Հայաստանի կառավարությունն ունի բարոյական պատասխանատվություն՝ պաշտպանելու Արցախի ժողովրդի իրավունքները, որոնք բռնի տեղահանվել են , ագրեսիայի ու էթնիկ զտման գործողությունների արդյունքում:

«Եթե Հայաստանը չպաշտպանի նրանց վերադարձի իրավունքը, ապա որևէ այլ երկիր չի զբաղվի այս հարցով։ Նույն հրատապությամբ և համոզմամբ Հարցը բարձրացնելը Հայաստանի համար կարող է կարևոր բանակցային գործիք լինել:Ներկայումս Հայստանի և Ադրբեջանի բանակցությունների սեղանին չկա որևէ հարց, որը նպաստավոր է Հայաստանի համար։ Վերադարձի իրավունքի պահանջով հանդես գալը Հայաստանի համար կարող է փոխել դիվանագիտական քննարկումներն իր օգտին, բացի այդ՝ վերադարձի իրավունքի համընդհանուր աջակցությունը գրեթե անվիճարկելի է։ Միջազգային իրավունքը և դիվանագիտական նորմերը նպասում են տեղահանված ժողովուրդների հայրենիք վերադառնալու իրավունքին առհասարակ:Բայց այս դիրքորոշումն առավել ամրապնդվում է մի շարք իրավական որոշումներով և միջազգային բանաձևերով», - մատնանշում է Օսկայանը:

Աղբյուր` Փաստինֆո