Փաստ ինֆո

Նորագավիթ թաղամասում երկու պատերազմների մասնակից, 26-ամյա Մհեր Խաչատրյանի սպանության գործով հետախուզվող Էդգար Կարաքեշիշյանը ձերբակալվել, սակայն՝ չի կալանավորվել։ Վերջինս մեղադրվում է սպանության օժանդակության մեջ, պաշտպանության կողմի գնահատմամբ, որպես օժանդակություն է գնահատվել պարզապես ներկայությունը։

Հիշեցնենք, որ հունիսի 13-ին Նորագավիթ թաղամասում գտնվող սուպերմարկետի մոտ հայտնաբերվել է նույն թաղամասի 26-ամյա բնակիչ Մհեր Խաչատրյանի դին՝ հրազենային վնասվածքով։ Քննությամբ պարզվել է, որ երիտասարդը սպանվել է մի խումբ անձանց կողմից, ովքեր զինված են եղել ատրճանակով և ինքնաձիգով, իսկ դեպքի վայրում գտնված և ակտիվ դերակատարում ունեցող մի խումբ անձինք՝ կացնով և մահակներով։

Սպանության պատճառը եղել է թաղամասի անչափահաս, 2006թ. ծնված բնակչի կողմից հորը՝ Ս.Հ.-ին պատկանող «Լադա 21114» մակնիշի ավտոմեքենան արագ վարելու հարցի շուրջ նույն թաղամասի մեկ այլ բնակչի՝ Մհեր Խաչատրյանի կողմից դիտողության արժանանալը, ինչից հետո պատանին կատարվածի մասին պատմել էր հորը, ով իր հերթին տեղի ունեցածի մասին տեղեկացրել էր ընկերոջը։ Տեսնելով, որ հանդիպման ընթացքում Ս.Հ.-ն ձեռքով հարվածում է Մհեր Խաչատրյանի դեմքին՝ Հ.Մ.-ն անմիջապես միջամտել է վիճաբանությանը և ատրճանակով կրակոցներ արձակել Մհեր Խաչատրյանի ուղղությամբ, որին միացել է Ն.Ա.-ն՝ ինքնաձիգով բազմաթիվ կրակոցներ արձակելով ու պատճառելով կյանքի հետ անհամատեղելի մարմնական վնասվածքներ։ Գործով երեք անձ կալանավորվել էր, մեկ անձի նկատմամբ որպես խափանման միջոց է կիրառվել բացակայելու արգելքը, երեք անձի նկատմամբ հետախուզում էր հայտարարվել։Նրանցից մեկը 38-ամյա Էդգար Կարաքեշիշյանն է, որը նախկինում դատվածություն է ունեցել՝ «Մանանա Գրեյն» ՍՊԸ փոխտնօրեն Արմեն Մանուկյանի ավտոմեքենայից 56 միլիոն 400 000 դրամի գողություն կատարելու գործով։ Այս գործով դատվածությունն արդեն մարված է։

Պաշտպան Էրիկ Ալեքսանյանը «Փաստինֆո»-ի հետ զրույցում հայտնեց, որ Կարաքեշիշյանը մեղադրվում է սպանության օժանդակության մեջ, մասնավորապես, ըստ իրավապահների՝ նա ամրապնդել է հանցակիցների՝ անմիջականորեն ենադրյալ հանցանք կատարած անձանց վճռականությունը հանցանքի կատարման մեջ։ Մեղադրանքի հետ պաշտպանության կողմը համաձայն չէ։

Դատարանը մերժել է Կարաքեշիշյանին կալանավորելու միջնորդությունը՝ հիմնավոր կասկածի բացակայությամբ՝ արձանագրելով, որ վարույթի հանրային մասնակիցը չի ներկայացրել որևէ փաստական տվյալ առ այն, որ Կարաքեշիշյանը «նախապես համաձայնություն տալով մասնակցել է Մհեր Խախատրյանին ապօրինի կյանքից զրկելուն՝ որպես համակատարող»։ Դատարանի դիտարկմամբ՝ նման տվյալներ կարող էին տրամադրել խմբի անդամները կամ նրանց օժանդակող անձինք , մինչդեռ, մեղադրյալ ներգրավված անձանցից որևէ մեկը նման բովանդակությամբ տեղեկություն չի տրամադրել ու չի ներկայացվել տեղեկություն այլ անձանց կողմից այդպիսի բովանդակությամբ ցուցմունք տալու վերաբերյալ։

Հեղինակ՝ Իզաբել Սահակյան

Աղբյուր` Փաստինֆո