Փաստ ինֆո

ՀՀ երկրորդ նախագահ Ռոբերտ Քոչարյանը, ՀՀ ԶՈՒ ԳՇ նախկին պետ, ՀԱՊԿ նախկին քարտուղար Յուրի Խաչատուրովը, ՊՆ նախկին նախարար Սեյրան Օհանյանը չեն ներկայացել Հակակոռուպցիոն դատարան՝ դատական նիստին։ Սարգիս Պետրոսյանի նախագահությամբ դատական նիստին ներկա է մեղադրյալներից միայն Արմեն Գևորգյանը, ըստ այդմ, քննարկման առարկա դարձվեց բացակա մեղադրյալների պայմաններում դատական նիստ անցկացնել-չանցկացնելու հարցը։ Պաշտպանության կողմի գնահատմամբ՝ նրանք մեղադրյալի կարգավիճակ չունեն, գոյություն չունի հոդված, որով նրանց մեղադրանք կա ներկայացված։ Հանրային մեղադրող Հայկ Հովհաննիսյանը, սակայն, դիրքորոշում հայտնեց առ այն, որ պատշաճ ծանուցման պայմաններում դատական նիստերի չներկայանալու դեպքում դատարանը պետք է քննարկման առարկա դարձնի նաև հարկադրանքի միջոց կիրառելու հարցը։

Տուժողի իրավահաջորդ Սարգիս Քլոյանն էլ հայտարարեց․ «Եթե Քոչարյանը մեղադրյալ չի, ուրեմն՝ ես Աստված եմ»։ Արմեն Գևորգյանի պաշտպան Լուսինե Սահակյանը դիրքորոշում հայտնեց՝ նիստը պետք է շարունակվի, քանի որ գործով միակ մեղադրյալն Արմեն Գևորգյանն է, որը մեղադրվում է համապատասխան հոդվածներով, բացակա անձ գոյություն չունի, ավելին՝ չի հասկանում, թե ինչու են դատական նիստերի դահլիճում գտնվում անձինք, որոնք չունեն դատավարական կարգավիճակ գործով։ Յուրի Խաչատուրովի փաստաբան Միհրան Պողոսյանն էլ հայտարարեց՝ մի շարք քրեաիրավական ընթացակարգեր կան, որոնք պետք է հաղթահարվեն, որ անձը մեղադրյալի կարգավիճակ ունենա, հիմա նման մեղադրանք չկա, իսկ ինքը դատական նիստին ներկայացել է, որովհետև հետաքրքիր է, թե ինչ պրոցես է տեղի ունենում։ Դատական նիստին ներկայանալու պարտավորություն Խաչատուրովը չունի, քանի որ պարտավորությունը ծագում է մեղադրյալի կարգավիճակ ունենալու պահից։

«ՀՀ գլխավոր դատախազությունն իր պարտականությունները չի իրականացրել, հիմա բերում են, գցում՝ Ձեր՝ դատարանի, գրպանը, Ձեզ են դրդում, որ այդ խախտումներին գնաք, դրա համար ենք մենք այստեղ։ Եկել ենք Ձեզ օգնելու, որ որևէ խախտում՝ դատախազության հորդորով՝ չիրականացնեք։ Որ ասում եք՝ մեղադրյալը չի եկել, կարո՞ղ եք ասել, թե որ հոդվածով մեղադրյալը։ Չկա այդ հոդվածը, գոյություն չունի ՀՀ-ում, այդ գոյություն չունենալուց հետո, եթե դատախազությունը նպատակներ է ունեցել կամ ծնվել է որոշ աշխատասենյակներում, հիմա այդ գնացքը գնացել է, եկել են՝ դատարանին են խնդրի առաջ կանգնեցրել»,- ասաց Միհրան Պողոսյանը։

Փաստաբան Կարեն Մեժլումյանը ևս դիրքորոշում հայտնեց՝ Օհանյանը մեղադրյալի կարգավիճակ չունի, իսկ նիստին չի ներկայացել, ի թիվս մեղադրյալի կարգավիճակ չունենալու, նաև ծանրաբեռնված է՝ ԱԺ-ում։
Ռոբերտ Քոչարյանի փաստաբան Արամ Օրբելյանն էլ ավելացրեց՝ նիստը պետք է շարունակվի, քանի որ բացակա մեղադրյալ չկա այս պահին։

Հիշեցնենք, որ 2008թ․ մարտի 1-ի իրադարձություններին առնչվող՝ իբրև սահմանադրական կարգի տապալման գործով մեղադրյալի կարգավիճակում էին ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում էին սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

ՍԴ-ի կողմից՝ 2021թ․ մարտի 26-ին ՀՀ Քրեական օրենսգրքի (2003թ․) 300,1-րդ հոդվածը Սահմանադրության 78-րդ և 79-րդ հոդվածներին հակասող և անվավեր ճանաչելուց հետո Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, սահմանադրական կարգի տապալման դրվագով կարճել էր քրեական գործը և դադարեցրել քրեական հետապնդումը՝ հանցադեպի բացակայության հիմքով, թեև դատախազները պահանջում էին վերաորակել արարքը։ Դատախազության վերաքննիչ բողոքը մերժվել է, իսկ Վճռաբեկ դատարանը դիմել էր ՍԴ՝ վիճարկելով Քրեական դատավարության օրենսգրքի մի շարք հոդվածների Սահմանադրությանը համապատասխանելու հարցը: Խնդիրը 1998-ին ընդունված, այժմ մասնակի գործող Քրեական դատավարության օրենսգրքի 309.1 հոդվածի 3-րդ մասն էր, որը հնարավորություն չէր տալիս հոդվածը հակասահմանադրական ճանաչելուց հետո դատարանում վերաորակել մեղադրանքը: ՍԴ-ն որոշել է մասնակի բավարրարել դիմումը՝ նշելով, որ թեև հոդվածը համապատասխանում է Սահմանադրությանը, այն մեկնաբանությամբ, որ ամբաստանյալին մեղսագրվող արարքը հակասահմանադրական ճանաչվելիս մեղադրողը կարող է մինչև դատարանի խորհրդակցական սենյակ հեռանալը փոխել ամբաստանյալին առաջադրված մեղադրանքը մեղադրյալի արարքում քրեական օրենքով նախատեսված այլ արարքի հատկանիշների առկայության պարագայում՝ անկախ դատական քննության ընթացքում ապացույցների հետազոտումից: Վճռաբեկ դատարանը որոշել է բավարարել դատախազության բողոքը։

Հեղինակ՝ Իզաբել Սահակյան

Աղբյուր` Փաստինֆո