Փաստ ինֆո

Ընդդիմադիր դաշտի լրագրողները մեծ բարդություններ են ունենում իշխանությունների ու պետական մարմինների գործունեությունը լուսաբանելիս։ Սա հասարակության, նաև լրատվամիջոցների բևեռացման և անհանդուրժողականության արդյունք է։ «Փաստինֆո»-ի հետ զրույցում արձանագրել է «Խոսքի ազատության պաշտպանության կոմիտեի» նախագահ Աշոտ Մելիքյանը՝ անդրադառնալով խորհրդարանում լրագրողների նկատմամբ բռնարարքներին։

Վերջին դեպքը գրանցվել է նորանշանակ արդարադատության նախարարի լուռ ներկայությամբ, երբ ԱԺ շենքում ՊՊԾ աշխատակիցները բռնություն են գործադրել «Հրապարակ» թերթի լրագրող Լուսինե Շահվերդյանի նկատմամբ, երբ վերջինս ցանկացել է հարցեր ուղղել նախարար նշանակված Սրբուհի Գալյանին։ ՊՊԾ աշխատակիցները միջամտել են ու քաշքշել լրագրողին, վնասել ձեռքը։ Դրանից մի քանի օր առաջ միջադեպ էր արձանագրվել «Մեդիահաբի» լրագրող Վահե Մակարյանի հետ՝ ԱԺ նախագահ Ալեն Սիմոնյանի մասնակցությամբ։

Ա.Մելիքյանը նշեց, որ լրագրողների մասնագիտական գործունեությանը խոչընդոտելու կոպիտ վերաբերմուքի բոլոր դեպքերի վերաբերյալ հայտարարությամբ հանդես են գալիս։

«Վերջին մեր անդրադարձը եղել է «Մեդիահաբ» լրատվական կայքի լրագրող Վահե Մակարյանի և Աժ նախագահ Ալեն Սիմոնյանի միջև տեղի ունեցածին», - ասաց Աշոտ Մելիքյանը եւ ընդգծեց. «Այդուհանդերձ ասեմ, որ սա հասարակության նաև լրատվամիջոցների բևեռացման և անհանդուրժողականության արդյունք է և արդեն ընդդիմադիր դաշտի լրագրողները մեծ բարդություններ են ունենում իշխանությունների ու պետական մարմինների գործունեությունը լուսաբանելիս»։

Նրա դիտարկմամբ՝ այսպես կոչված իշխանամետ լրատվամիջոցների լրագրողներն էլ բարդություններ են ունենում ընդդիմադիր գործիչների հետ շփվելիս և դա ոչ միայն խորհրդարանում է տեղի ունենում, այլև հանրային միջառումներում։

«Պետք է հաշվի առնել, որ խորհրդարանի ընդդիմադիր ֆրակցիաների պատգամավորները նույնպես պետական մարմիններում պաշտոն զբաղեցնող անձիք են ու նրանց կողմից կոպիտ վերաբերմունքի դեպքեր ևս արձանագրվել են իշխանամետ լրագրողների նկատմամբ, բայց, բնականաբար, այդ անհանդուրժողականության հաղթահարման պատասխանատուն իշխանություններն են և իրենք պետք է քայլեր ձեռնարկեն, որպեսզի և՛ քաղաքական դաշտում, և՛ հասարակության մեջ, և՛ հատկապես լրատվական դաշտում բևեռացումը մեղմացվի և, ի վերջո, անցնեն աշխատելու քաղաքակիրթ մեթոդների»,- ասաց Մելիքյանը։

Արձանագրենք, որ դատախազաքննչական մարմինները դեռ չեն արձագանքել թե Վ.Մակարյանի, թե Լ.Շահվերդյանի նկատմամբ կիրառված բռնություններին։

Աղբյուր` Փաստինֆո