Փաստ ինֆո

Ապաշրջափակման հարցով Բաքվին առաջարկներ ենք ներկայացրել, Բաքվից դեռևս գրավոր արձագանք չի եղել, սպասում ենք արձագանքի։ Այս մասին ԱԺ-ում լրագրողների հետ ճեպազրույցի ընթացքում ասաց ԱԺ արտաքին հարաբերությունների հանձնաժողովի նախագահ Սարգիս Խանդանյանը։

«Չեմ կարող դետալներին անդրադառնալ, բայց, ընդհանուր առմամբ, առաջարկների ոգին բխում է «Խաղաղության խաչմերուկ» նախագծից և այն պատկերացումներից, որոնք ՀՀ կառավարությունը ներկայացրել է այս վերջին տարիներին։ Առաջարկների հիմքում երկու սկզբունքներն են՝ ինքիշխանությունը և իրավազորությունը»։

Հարցին՝ ինչպե՞ս է վարչապետը հայտարարում, որ հնարավոր է փոխադարձ ընդունելի լուծումներ լինեն, եթե Բաքվից դեռ արձագանք չկա՝ Խանդանյանը պատասխանեց, որ այն խոսակցությունից, որը տեղի են ունեցել Կազանում՝ կարելի է ենթադրել, որ որոշակի դետալներ քննարկվել են։ «Շատ ճիշտ եք նշում, դրանից հետո հնարավոր է լինի փոխընդունելի լուծում։ Երբ արձագանքը ստանանք, այդ «հնարավոր»-ն ավելի նյութական կդառնա»։

Դիտարկմանը, թե ստացվում է՝ առանձի՞ն փաստաթուղթ է բանակցվում, այս առաջարկը «Խաղաղության պայմանագրում» չի ներառվել ՝ Խանդանյանը պատասխանեց, որ սա իրավական առումով՝ փաստաթուղթ չէ, այլ պարզապես նամակագրություն է։ «Ինչպես գիտեք՝ «Խաղաղության պայմանագրում» ապաշրջափակման հարցն առանձնացվել է»։
Անդրադառնալով Նիկոլ Փաշինյանի հայտարարությանը, թե Ադրբեջանի հետ ռազմավարական գործարք պետք է կնքվի՝ Խանդանյանը նշեց, որ դրանք նույն սկզբունքներն են, որի մասին խոսում են և որոնք «Խաղաղության պայմանագրի» բանակցությունների հիմքն են՝ ապաշրջափակումը, սահմանազատումը, տարածքային ամբողջականության ճանաչումը, միմյանց ներքին գործերին չխառնվելը, հարաբերությունների նորմալացումը։

«Այս կոնտեքստում շատ կարևոր է ապաշրջափակման կտորը, քանի որ ապաշրջափակման դեպքում տեղի են ունենալու շարժեր՝ կոմունիկացիոն, լոգիստիկ, որոնք օգուտներ են բերելու ինչպես ՀՀ-ին, այնպես էլ Ադրբեջանին»։
Լրագրողները հետաքրքրվեցին, թե այդ դեպքում ի՞նչ իմաստ ունի ռազմավարական գործարք կնքել, եթե այդ ամենն արդեն «Խաղաղության պայմանագրում» կա՝ նա պատասխանեց. «Ռազմավարական գործարքը փաստաթուղթ կնքելու մասին չէ, այլ այդ բոլոր բանակցություններին և քննարկվող իրողություններին այնպիսի տրամադրություն հաղորդելն է, որոնք փոխշահավետ կլինեն»։

Հարցին, թե եթե վարչապետը փոխշահավետ լուծման մասին է խոսում՝ կարելի՞ է համարել, որ Բաքուն հրաժարվել է միջանցք պահանջելու մտքից՝ Խանդանյանը պատասխանեց, որ պետք է սպասել Ադրբեջանի արձագանքին, հետո եզրահանգումներ անել։ «Ինչպես գիտեք՝ Հայաստանի համար նման լուծումներն անընդունելի են։ Երբ խոսում ենք փոխշահավետ լուծման մասին կամ փոխադարձաբար ընդունելի լուծման մասին, դա բացառում է որևէ միջանցքային տրամաբանություն»։

Աղբյուր` Փաստինֆո