Փաստ ինֆո

Նիկոլ Փաշինյանի ավտոշարասյան կողմից հղի կնոջ՝ Սոնա Մնացականյանի՝ մահվան ելքով վրաերթի ենթարկելու վերաբերյալ գործի քննությունը դատարանում ձգձգվում է, շուրջ 9 ամիս է, ինչ գործն ավարտական փուլում է, սակայն ճառերի փուլին անգամ այդպես էլ չի հասել։ Գործով անցնող միակ մեղադրյալը «Ծեծեմ Արամ» մականունով հայտնի ՃՈ ծառայող Արամ Նավասարդյանն է, իսկ Փաշինյանի շարասյան ղեկավարի, Փաշինյանին ուղեկցող ԱԱԾ ՊՊԾ պետի տեղակալի գործողություններին կամ անգործությանը որևէ գնահատական այդպես էլ չի տրվել, ավելին, նրանց մասով նախաքննական մարմինը կարճել է վարույթը։

Հիշեցնենք, որ 2022թ. ապրիլի 26-ին՝ ժամը 18.05-ի սահմաններում, Լեո-Պարոնյան-Պռոշյան փողոցների հատվածում Նիկոլ Փաշինյանի կառավարական ավտոշարասյան մեքենաներից մեկը վրաերթի է ենթարկել 28 տարեկան երիտասարդ հղի կնոջ՝ Սոնա Մնացականյանին, որը տեղափոխվել էր «Նաիրի» հիվանդանոց, որտեղ էլ գիտակցության չգալով՝ մահացել է։ Չի հաջողվել փրկել նաեւ պտղի կյանքը։ Ականատես վկան լրագրողներին հայտնել էր, որ վրաերթից հետո շարասյունը հեռացել է, չի կանգնել՝ տուժածին օգնություն ցույց տալու համար։ ՔԿ-ն, եւս, ի սկզբանե հայտարարել էր, որ վրաերթից հետո վարորդը հեռացել է ու միայն 2 ժամ անց վերադարձել։ Այդուհանդերձ՝ՃՈ մայոր Արամ Նավասարդյանին մեղադրանք էր առաջադրել միայն ՀՀ քրեական օրենսգրքի 242-րդ հոդվածի 2-րդ մասով՝ մահվան ելքով վրաերթի համար, իսկ դեպքի վայրը լքելու դրվագով՝ ոչ: Հետագայում, գործի նկատմամբ հսկողություն իրականացնող դատախազը ցուցում է տվել՝ լրացնել մեղադրանքը՝ մեղադրանք առաջադրելով նաև ՀՀ քրեական օրենսգրքի 244-րդ հոդվածի 1-ին մասով և ՀՀ քրեական դատավարության օրենսգրքի 130-րդ հոդվածով սահմանված կարգով որոշում կայացնել մեղադրյալի նկատմամբ կալանավորումը որպես խափանման միջոց ընտրելու միջնորդություն հարուցելու մասին: Քննիչը նախ առարկել էր, ապա ստիպված կատարել դատախազի ցուցումը, քանի որ առարկությունները մերժվել էին։ Նավասարդյանի մեղադրանքը լրացվել է և կալանավորման միջնորդություն ներկայացվել դատարան, որը մերժվել է։ Գործով անցնող միակ մեղադրյալը Արամ Նավասարդյանն է՝ «Ծեծեմ Արամ» մականունով հայտնի։ Տուժող կողմը գտնվում է, որ նախաքննությունն իրականացվել է խիստ սուբյեկտիվ և նախապես որոշված շրջանակներում, այսինքն՝ բացառապես ՃՈ վարորդի՝ մեղադրյալ Արամ Նավասարդյանի գործողությունների գնահատման ուղղությամբ, հետևաբար քննության բազմակողմանիության մասին խոսք լինել չի կարող։ Ավելին, պարզվում է, որ գործից կարևոր ապացույցներ՝ ձայնագրություններ են անհետացել։

Արամ Նավասարդյանի դրվագով քրեական վարույթն արդեն ավելի քան երկու տարի է, ինչ Երևանի ընդհանուր իրավասության քրեական դատարանի դատավոր Կարեն Ֆարխոյանի վարույթում է։ Տուժողի իրավահաջորդի ներկայացուցիչ Րաֆֆի Ասլանյանը «Փաստինֆո»-ի հետ զրույցում հայտնեց, որ հաջորդ դատական նիստին պաշտպանության կողմի միջնորդության հիման վրա պետք է հարցաքննվի դատատեսաձայնագրային փորձաքննության վերաբերյալ փորձագետը։

«Այսինքն դեռ դատաքննությունը լրացնելու միջնորդությունների փուլում ենք»,- նշեց նա՝ հավելեով, որ ըստ էության՝ արդեն ավարտական փուլում են՝ 8-9 ամիս։

Դիտարկմանը, թե արդյո՞ք ձգձգման միտում չկա, հնարավոր է, որ վաղեմության ժամկետների խնդիր առաջանա՝ փաստաբանը նշեց, որ այսպես շարունակվելու դեպքում՝ չի բացառում։

Ինչ վերաբերում է ավտոշարասյան ղեկավարի և նրա տեղակալի նկատմամբ քրեական հետապնդում չհարուցելու հերթական որոշումներին, ապա դրանք բողոքարկվել են, սակայն որոշումները դեռևս չեն ստացվել։ Փաստաբանը նշեց, որ բողոքներից մեկը մակագրված է դատավոր Մասիս Մելքոնյանին, մյուս բողոքի վերաբերյալ դեռևս վարույթի որոշում չի ստացվել։ Այդ մասով գրություն է հասցեագրվել դատարանի նախագահին։

Հեղինակ՝ Իզաբել Սահակյան

Աղբյուր` Փաստինֆո