Փաստ ինֆո

Հայաստանում մի երևույթ կա, ջահել տղայի հետ ես խոսում, ասում է՝ ես սասունցի եմ, ասում ես՝ օկ, գնում ես մեկ այլ տեղ՝ մեկ ուրիշն ասում է՝ ես մշեցի եմ, 5-րդն ասում է՝ դե ես վանեցի եմ, 7-րդը՝ խոյեցի եմ, 8-րդը՝ իգդիրցի եմ, շատ լավ, հասկանում եմ, բա դիլիջանցին ո՞վ է էս երկրում։ Այս մասին ԱԺ-ում 2025 թվականի պետական բյուջեի նախագծի քննարկման ժամանակ հայտարարեց վարչապետ Նիկոլ Փաշինյանը։

«Բա երևանցին, բա աշտարակցին ո՞վ է էս երկրում։ Ես դեմ չեմ դրան, ամենայն հարգանքով, ես չեմ կարող ոչ մշեցի լինել, ոչ վանեցի, որովհետև ես իջևանցի եմ։ Ես էլ եմ ուզում, բայց ես սենց ապազգային տարր եմ, Ենոքավանից էն կողմ չեմ կարող գնալ, ինչքան արխիվները քանդում եմ, ուզում եմ մի տենց մի էջ էլ ինձ համար բացեմ՝ չի լինում»,-ասաց նա՝ ընդգծելով, որ մենք չենք հասկանում, որ երբ մենք Դիլիջանում ապրելով ասում ենք՝ վանեցի ենք, կորցնում ենք Դիլիջանը։

«Մենք Դիլիջանը կորցնում ենք, մենք միջանցք ենք բացում, որ ասեն՝ էդտեղ բնկի մարդ չկա, դրանք ստեղից-ընդեղից էկած են, իսկ սա հին թուրքական քաղաք է, սա էլ հին ադրբեջանական քաղաք է։ Լսում են՝ չէ ինչ ենք խոսում։ Մենք կորցնում ենք մեր պետությունը, մենք կորցրել ենք մեր պետությունը»։

Նա ընդգծեց, որ վերջին տարիներին 10-յակ անգամներ կարդացել է մեր Անկախության հռչակագիրը։ «Տասնյակ անգամներով կարդացել եմ Անկախության հռչակագիրը և եկել եմ մի եզրակացության, որ Անկախության հռչակագրի բովանդակությունը նրա մասին է, որ Հայաստանի Հանրապետություն չի կարող գոյություն ունենալ։ Եվ սա մեր ամենամեծ պրոբլեմն ու ողբերգությունն է։

Հիմա հարց է, թե որն է իրական Հայաստանը, իրական Հայաստանի քաղաքացին նա է, ով էստեղից դուրս հայրենիք ու պետություն չի փնտրում»,-ասաց նա՝ ցուցադրելով ՀՀ մակետը, ապա ավելացրեց.
«Իրական Հայաստանի քաղաքացին նա է, ով փնտրել, փնտրել, փնտրել է, ու գտել է իր հայրենիքը՝ Հայաստանի Հանրապետությունը»,-ասաց նա։

Աղբյուր` Փաստինֆո