Փաստ ինֆո

Ադրբեջանի պնդումները, թե ՀՀ սահմանադրությունը պարունակում է տարածքային պահանջներ Ադրբեջանից, հիմնվում է այն փաստի վրա, որ ՀՀ սահմանադրության նախաբանում կա հղում Անկախության հռչակագրին, որտեղ իր հերթին հիշատակվում է ԼՂ-ի մասին։ Այս մասին այսօր ԱԺ-ում ասաց ՀՀ վարչապետ Նիկոլ Փաշինյանը։

Նա նաև անդրադարձավ ՀՀ Սահմանադրական դատարանի սեպտեմբերի 26-ին կայացրած որոշմանը, որով ՍԴ-ն արձանագրել է, որ Սահմանադրության նախաբանում Անկախության հռչակագրին հղումը վերաբերվել է Հռչակագրի բացառապես այն դրույթներին, որոնք իրենց բառացի ամրագրումն են ունեցել Սահմանադրության հոդվածներում։

«ՀՀ Սահմանադրության տեքստում որևէ դրույթ Լեռնային Ղարաբաղի մասին, ոչ ուղղակի, ոչ անուղղակի չի պարունակում։ Պետք է հիշել նաև, որ Անկախության հռչակագրի և Սահմանադրության մեջ գոյություն ունի ըստ ընդունող սուբյեկտների հստակ աստիճանակարգային տարբերություն։ Այսինքն, եթե Անկախության հռչակագիրը ընդունվել է հայկական ԽՍՀ ԳԽ-ի՝ որպես ԽՍՀՄ կազմում գտնվող 15 միութենական հանրապետություններից մեկի կողմից, ապա Սահմանադրությունն ընդունվել է ՀՀ միջազգայնորեն ընդունված ինքնիշխան ժողովրդի կողմից։

Հաջորդ փաստարկն այն է, որ Ադրբեջանի սահմանադրության նախաբանը հղում է պարունակում 1991 թ-ի հոկտեմբերի 18-ին ընդունված սահմանադրական ակտին, որն իր հերթին հղում է պարունակում 1918 թ-ին մայիսի 18-ին ընդունված Ադրբեջանի հանրապետության անկախության հռչակագրին։ Ադրբեջանի առաջին հանրապետության հռչակագիրն արձանագրում է, որ Ադրբեջանի առաջին հանրապետությունը ներառում է Արևելյան և Հարավային Անդրկովկասը։
1919 թ-ի նոյեմբերին Ադրբեջանի Հանրապետությունը «Անտանտ»-ին է ներկայացրել իր վարչատարածքային քարտեզը, համաձայն որի՝ Ադրբեջանի կազմում ընդգրկված են ՀՀ Սյունիքի, Վայոց Ձորի մարզերն ամբողջությամբ, ինչպես նաև Արարատի, Արմավիրի, Գեղարքունիքի, Տավուշի, Լոռու Շիրակի մարզերի տարածքները մասամբ, Եթե ընդհանուր առմամբ վերցնենք ՀՀ-ի այսօրվա տարածքի շուրջ 60-ը։ Այսպիսով , ակնհատ է դառնում, որ Ադրբեջանի սահմանադրությունը պարունակում է տարածքային պահանջներ ընդդեմ Հայաստանի Հանրապետթյան»։
Փաշինյանն ընդգծեց, որ Հայաստանը սական Ադրբեջանի սահմանադրությունը փոխելու հարց չի բարձրացնում 2 պատճառով։ «Նախ՝ նման պահանջը փակուղի կմտցնի բանակցային գործընթացը, երկրորդը՝ Հայաստանի և Ադրբեջանի միջև բանակցվող Խաղաղության պայմանագրում կա համաձայնեցված հոդված, որը արձանագրում է, որ կողմերը չեն կարող հղում անել իրենց ներքին օրենսդրությանը՝ արդարացնելու համար սույն պայմանագրի իրագործման ձախողումը։
Խաղաղության պայմանագրի մեկ այլ հոդվածում ասվում է, որ կողմերը ճանաչում են միմյանց տարածքային ամբողջականությունը, միմյանց նկատմամբ չունեն տարածքային պահանջներ և պարտավորվում են ապագայում ևս նման պահանջներ չառաջադրել»։

Նա ընդգծեց, որ Խաղաղության պայմանագիր ստորագրվելուց հետո այն պետք է վավերացվի խորհրդարանում, մինչ այդ այն ուղարկվելու է Սահմանադրական դատարան՝ դրա համապատասխանությունը ՀՀ սահմանադրությանը որոշելու համար։ «Եթե ՍԴ-ն որոշի, որ Խաղաղության պայմանագրի տեքստը չի համապատասխանում Սահմանադրությանը ՀՀ-ն կարող է նախաձեռնել Սահմանադրական փոփոխություններ։ Սա արդեն քաղաքական ընտրության հարց է»,-ասաց Փաշինյանը։

Աղբյուր` Փաստինֆո