Փաստ ինֆո

Արցախցիների ընտրելու իրավունքի հարցի հետ կապված քննարկում արցախցիների հետ չի եղել։ Այս մասին «Փաստինֆոյի» հետ զրույցում ասաց Արցախի «Արդարություն» կուսակցության նախագահ Հակոբ Հակոբյանը։

Դիտարկմանը, թե նման թեմայով թեժ քննարկման մասին Ազգային Ժողովում խոսել են ՆԳ փոխնախարարը՝ նա պատասխանեց, որ իրադարձությունները այնպես են ծավալվել, որ արցախցիները գտնվում են Հայաստանում, ապա Հայաստանի իշխանությունները չպետք է որևէ խոչընդոտ ստեղծեն, որպեսզի արցախցիները կարողանան մասնակցել ընտրություններին՝ ինչպես ընտրելու, այնպես էլ ընտրվելու իրավունքով։

«Սա յուրահատուկ իրավիճակ է, ու ՀՀ իշխանությունները չպետք է խոչընդոտեն ու զրկեն մարդկանց իրենց ընտրական իրավունքից՝ ինչպես ընտրելու, այնպես էլ ընտրվելու առումով։ Թե այդ քննարկումները ում հետ են եղել, ինչ քննարկումներ են՝ ԱԺ-ում այդ աղքատիկ հարցուպատասխանից պարզ չդարձավ, պարզ չէր նաև, թե արդյոք որևէ լուծում առաջարկվել է, թե ոչ։ Ամեն դեպքում, արցախցիներս այդ մասին որևէ տեղեկություն չունենք։

Ցավոք, ես կարծում եմ, որ այս իշխանությունները վերընտրվելու համար ամեն ինչի պատրաստ են, դրա վառ ապացույցը Ընտրական օրենսգրքում տարատեսակ փոփոխություններ անելն է, սակայն որևէ կերպ որևէ «070» կոդ չպետք է առիթ կամ պատճառ հանդիսանա երկրի քաղաքացուն զրկելու՝ իր գլխավոր իրավունքներից մեկից։ Ուստի, կարծում եմ, մենք էլ պետք է ամեն ինչ անենք, որպեսզի դա չդառնա միջոց ընտրական արդյունքների վրա ազդելու»,-ասաց Հակոբյանն՝ ընդգծելով, որ արցախցիների՝ ՀՀ քաղաքացիներ լինել-չլինելու հարցը արհեստականորեն դաշտ բերված հարց էր ՀՀ իշխանությունների կողմից, որպեսզի արցախցիներին շեղեն գլխավոր հարցերի շուրջ մտածելուց։

«Սկզբնական շրջանում բոլոր արցախցիների մոտ էր այդ հարցն առաջացել՝ իրենք քաղաքացի են, թե՝ ոչ, եթե անգամ իրավական առումով որևէ խոչընդոտ էր առաջացրել «070» կոդի առկայությունը, ապա այս իշխանությունն այնքան կամք պետք է ունենային, որ կարողանային որևէ որոշմամբ կամ օրենսդրական փոփոխությամբ այդ հարցը լուծել։ Արցախցից տեղափոխված մեր հայրենակիցները իրենց միշտ էլ լիիրավ զգացել են ՀՀ քաղաքացիներ, իհակե, մենք գիտեինք, որ Արցախում գտնվելու ընթացքում արցախցիներն ընտրություններին Հայաստանում չէին մասնակցում։ Սակայն այս իշխանությունները պետք է հասկանան, որ 2023 թ-ի սեպտեմբերյան դեպքերից հետո իրավիճակ է փոխվել և, եթե նրանք ցանկանում են այդ հարցը լուծել, ապա կարող էին շատ արագ և հեշտությամբ լուծել»,-ասաց նա։

Դիտարկմանը, թե արդյոք ՀՀ իշխանությունները խիզախություն կունենան այս խնդիրը լուծելու և չե՞ն վախենա՝ նա պատասխանեց, այս իշխանությունները պետք է շատ լավ հասկանան, որ Արցախի ժողովուրդը շատ լավ է հասկանում պետության և պետականության գինը։ «Մասնակցելուվ ՀՀ-ում տեղի ունեցող ընտրություններին՝ քվեարկելու են այդ պետության զարգացման համար, եթե որևէ իշխանություն ցանկանում է, որ այս երկիրը մնա հայկական ու զարգանա՝ չպետք է մտավախություն ունենա արցախցիներին ընտրություններից հեռու պահելու։ Արցախցիների ընտրություններից հեռու պահելու ցանկություն կարող են ունենալ այն իշխանությունները, որոնց չի հետաքրքրում երկրի զարգացումը, այլ միայն հետաքրքրում է իրենց վերարտադրվելը, ուստի նման որոշում կայացնելուց առաջ այդ իշխանությունները պետք է այդ մասին մտածի»։

Աղբյուր` Փաստինֆո