Փաստ ինֆո

«Հայաստան» խմբակցության պատգամավոր Գեղամ Մանուկյանն ԱԺ հերթական նիստին բյուջեի նախագծի քննարկմանը՝ մտքերի փոխանակության ժամանակ ասաց, որ այս տարի որոշել է իր գործը թեթևացնել, բյուջեի նախագծի մասին խոսելիս՝ անցնող տարիների մի թունդ ընդդիմադիրի ելույթներից օգտվել՝ ելույթը պատրաստելու համար, ապա մեջբերեց Նիկոլ Փաշինյանի տարբեր ժամանակահատվածում բյուջեի քննարկման ժամանակ հնչեցրած ելույթներից:

«Բյուջեի քննարկում, 2012 թ., 14 նոյեմբեր, ԱԺ, այս ամբիոն. պատմության մեջ առաջին անգամ 2013 թվականի բյուջեով արտաքին պարտքի սպասարկման համար անհրաժեշտ հատկացումները գերազանցել են 400 մլն դրամը, և նախատեսվում է այդ նպատակի համար հատկացնել 418 մլն դրամ: Խայտառակություն էր գնահատվում 2012 թվին, 1 մլն դոլար էր մոտավորապես: 2025 թվականի բյուջե՝ արտաքին պարտքի սպասարկման համար 1 մլրդ դոլար է նախատեսվում»,- նշեց նա՝ ընդգծելով, որ կառավարությունն հիմա վստահեցնում է, որ արտաքին պարտքի սպասարկումը որևէ վտանգ չի սպառնում, արտաքին պարտք է՝ կարող ենք մեծացնել:

«Երեկ Արծվիկ Մինասյանը թիվ հրապարակեց, որ ՀՀ ամեն քաղաքացի ամսական 25 դրամ պարտքի տակ է։

Անդրադառնալով ծառայողական մեքենաներին ծախսերը գաղտնի պահելուն՝ Մանուկյանն հիշեցրեց 2015-ին Նիկոլ Փաշինյանը նոյեմբերի 4-ին «ՀԺ»-ում արված մի հարապարակմանը, որտեղ պնդում էր արվել, որ 5,6 մլն բնակչություն և շուրջ 120 մլրդ դոլարանոց բյուջե ունեցող Դանիայում ամբողջ պետական համակարգում կա ընդամենը 23 մեքենա, «ու մինչ սահմանադրական փոփոխությունների «այո»-ի ու «ոչ»-ի ճակատները քննարկում են, թե Հայաստանն ինչպիսի պետություն պետք է լինի, «крупный» գործ անող տղերքը բոլորիս աչքի առաջ կառուցում են այսպիսի չնաշխարիկ պադավապետություն, է մեր իրական կյանքի իրական անվանումը։

2016 թ-ին Փաշինյանը գրում էր. «Մենք զարմանալի պետություն ենք, քաղաքապետարանի տրանսպորտի վարչության պետին ծառայողական մեքենա ենք տալիս, ասում ենք՝ գնա գործի, արի տուն»»,- ամփոփելով մեջբերումը՝ Մանուկյանն ավելացրեց.

«2024 թ-ին Երևանի քաղաքապետարանը 644 000 դոլար ծախսել է 20 հատ էլեկտրամոբիլ գնելու համար, որոնցից մեկը հենց այդ տրանսպորտի վարչության պետինն է։ 20 մեքենա՝ 28 000 դոլարով։

Դանիայի խորհրդարանի նախգահն ինչ միամիտ մարդ է, կարող էր ասել. Ժողովուրդ խորհրդարանի նախագահը չի կարող որոշել, թե քանի մեքենա առնեմ: Օրինակ ՝Ալեն Սիմոնյանն ասում է՝ ես ի՞նչ կապ ունեմ, երկու հատ ջիպ իմ BMW-ի հետևից գնում է:

Էն օրը ՊՊԾ պետի տեղակալին ասում եմ 2 հատ ջիպը Աննա Հակոբյանի համար 146 000 դոլարով դուք եք որոշել առնել, թե ինքն է ուզել, ասում է՝ մենք ենք որոշել։ Սաղ ՊՊԾ-ն է մեղավոր: Հայաստանում որևէ այլ պաշտոնյա իրավունք ունի՞ ասելու՝ ՊՊԾ, դու թանկ մեքենա մի՛ առ, չէ՛, չի՛ կարող»:

Պատգամավորն անդրադարձավ նաև ՊՆ-ի և ձեռքբերվող ռազմատեխնիկայի մասին: «Այդքան խոսում եմ, կռվում եմ ՊՆ պաշտոնյաների հետ, ռազմական ոլորտը, զենքի վաճառքը գաղտնիություն են պահանջում, ՀՀ ԶՈՒ-ն այսօր դարձել է Հնդկաստանի ռազմաարդյունաբերության գովազդային վահանակը: Երեկ ամբողջ հայկական մամուլը գրել է՝ այսինչ հրթիռը ուղևորվել է Հայաստան, դրա համար անընդհատ ասում եք՝ լոգիստիկ խնդիր կա: Ասում եմ՝ պայմանագրի մեջ կետ ավելացրեք, որ գաղտնի լինի, բայց չէ, կարևոր է, որ հայ մարդը տանը նստած իմանա, որ Հնդկաստանից հրթիռը որ ելավ, չգիտեմ՝ ոնց է գալու, բայց ինքն ասի՝ վերջ»,- շեշտեց նա:
Մանուկյանի այս խոսքերից հետո ՔՊ-ական պատգամավորները սկսեցին տեղից խոսել, ապա նաև Պաշտպանության նախարար Սուրեն Պապիկյանը սկսեց վիճել, սակայն ԱԺ նախագահ Ալեն Սիմոնյանը նկատողություն արեց նրանց:

«Մեկ րոպե լռություն, պարո՛ն Պապիկյան, հարգելի՛ գործընկերներ, «Քաղաքացիական պայմանագիր» խմբակցության իմ գործընկերնե՛ր, չի կարելի տեղից խոսել, պարոն Մանուկյանը քաղաքական լավ ելույթ ունեցավ, և չի կարելի խանգարել, անկախ նրանից, թե ինչ է ասում, չի կարելի խանգարել»,- շեշտեց նա

Աղբյուր` Փաստինֆո