Փաստ ինֆո

Էհ, պարոն Քոչարյան, էն ՍՈՒ-30-ներով էլ էինք ոգևորված, քանի կիլոմետր թռանք։ Այս մասին ԱԺ-ում 2025 թ-ի բյուջեի քննարկման ընթացքում ասաց «Հայաստան» խմբակցության պատգամավոր Արթուր Խաչատրյանը՝ դիմելով ԱԺ անվտանգության և պաշտպանության հարցերով մշտական հանձնաժողովի նախագահ Անդրանիկ Քոչարյանին։

Քոչարյանն էլ արձագանքեց, թե՝ «Էլի պետք է ոգևորվենք, հանգիստ եղեք»։

Խաչատրյանն էլ առարկեց, թե կոգևորվենք, երբ մի հրթիռ կարձակի, մի թիրախ կխոցի, ապա անդրադարձավ ՆԳՆ աշխատակիցների առողջական հարցերին՝ նշելով, թե՝ «վատ է , որ թմրանյութեր օգտագործող ոստիկաններ կան, վատ է, որ ոստիկաններ կան, որ երբ կանգնում են՝ փորը ձեռքից երկար է, բայց ես ուզում եմ խոսել հոգեկան առողջության ստուգելու մասին։ Խոսքս հատկապես վերաբերվում է ոստիկանության զորքերին, հատկապես՝ կարմիր և սև բերետներին։ Չե՞ք կարծում, որ նրանք ծառայությունից առաջ ու դրա ընթացքում պարտադիր պետք է թեստավորեն բռնության հակվածություն ունենալու համար։ Տարբեր երկրներում հատուկ թեստեր կան որոնցով ստուգում են՝ այդ մարդիկ նման հակվածություն ունե՞ն, թե՞ ոչ։ Իմ մոտ այն տպավորությունն է որ հակառակ ընտրություն է կատարվում և սադիստական հակվածություն ունեցող մարդկանց են ներգրավում ոստիկանության զորքերում։ Դրան էլ ավելացնենք այս ամբիոնից հունիսի 12-ին Փաշինյանի արած հայտարությունը, թե ոստիկանները ապօրինի բան չեն արել, մենք չենք տեսել, որ որևէ բերետ բռնություն կիրառելու համար դատվի»։

Քոչարյանը պատասխանեց, որ հունիսի 12 –ի հետ կապված ընդդիմադիր խմբակցությունները ուզում էին նախաձեռնել քննիչ հանձնաժողով, բայց այդպես էլ չստեղծեցիք, որ հասկանանք, թե ինչու տեղի ունեցավ այդ բախումը։ Ապա նաև նշեց, որ համաձայն է, որ ոստիկանները պետք է անցնեն որոշակի ստուգումներ՝ նաև հոգեկան, ինչը նախատեսված է ոստիկանության գվարդիայի ձևավորման նախագծում։

Խաչատրյանը նշեց, որ «լավ է հույսները դրել են կամ խրախուսում են ընդդիմության կողմից նախաձեռնվող քննչի հանձնաժողովները, բայց անարդարացիորեն տորպեդահարում են ընդդիմության կողմից ստեղծված քննիչ հանձնաժողովների աշխատանքները։

Կա ողջամիտ կասկած, որ ոստիկանության զորքերում ներգրավում եք սադիստական հակվածություն ունեցող անձանց, ի՞նչ եք անում նման մարդկանց ներգրավումը համակարգ կանխելու համար, որովհետև մահակը՝ ինչպես փամփուշտը քոռ է, էսօր մեր գլխին է իջնում, վաղը հայտնի չի՝ ուր է իջնելու»,-ասաց Խաչատրյանը։
Քոչարյանն էլ պատասխանեց, որ պետք է առերեսվել այն իրողությունների հետ, որը կոչվում է քաղաքական պայքար։

Աղբյուր` Փաստինֆո