Փաստ ինֆո

Ադրբեջանը և Թուրքիան թշնամի են և գործում են թշմանական տրամաբանության մեջ, այստեղ մենք չպետք է զարմանանք և ծնկներիս խփենք՝ ասելով, թե վայ, այդ ինչ ասեց Ալիևը, մենք պետք է զարմանանք, թե ինչու է Հայաստանի, այսպես կոչված, իշխանությունը, որը պատասխանատու է ՀՀ անվտանգության համար, գործում թուրքերի և ադրբեջանցիների հետաքրքրությունների ներքո։

Այս մասին «Փաստինֆո»-ի հետ զրույցում ասաց ԱԺ նախկին պատգամավոր Արման Աբովյանն՝ անդրադառնալով նոյեմբերի 9-ին Իլհամ Ալիևի հերթական անգամ հնչեցրած սպառնալիքներին։

«Երբ մենք խոսում ենք խաղաղության պայմանագրի մասին՝ դա իրականում խաղաղության պայմանագիր չէ , այն, ինչ իրենք բանակցում են՝ Հայաստանի կազմալուծման շուրջ փաստաթուղթ է, որը տրամաբանորեն պետք է պայմաններ ստեղծի իրավական առումով արևմտյան Ադրբեջան ստեղծելու համար»։

Նա ընդգծեց, որ մինչև վերջ չստորացվի հայկական ինքնագիտակցությունը, ինչն ադրբեջանցիները հնարավոր են համարում հայ գերիների ու պատանդների հանդեպ դատավարության իրականացմամբ, Ադրբեջանը չի հանգստանա։

«Հիշեցնեմ, որ Ալիևը ինչ- որ լաթի հետ էր նկարվել, իբրև թե դա Երևանի դրոշն է, Ալիևը և Թուրքիան շատ հստակ արդեն ոչ թե մեսիջ են ուղարկում, այլ ուղիղ ասում են՝ հայեր, դուք պետք է համաձայնեք մի կտոր հացի դիմաց հանձնել երկիրը։

Մինչդեռ, ՀՀ իշխանությունը մի կոնցեպտ է որդեգրել, որը կոչվում է պետություն-ստամոքս, այդ կոնցեպտի ներքո Ալիևի սպառնալիքները լրիվ տրամաբանական են, ի վերջո, ինչ տարբերություն՝ որտեղ մարդը հացը ուտի, եթե մենք պետություն -ստամոքս կոնցեպտի մասին ենք խոսում», - նկատել է Ա.Աբովյանը։

Անդրադառնալով COP 29-ից հետո հնարավոր զարգացումներին՝ նա նշեց, որ ոչ մի լավ բանի պետք չէ սպասել: «Հիմնական խնդիրները առաջանում են նրանից, որ ՀՀ իշխանությունները փորձում են թշնամի ներկայացնել ներքին դաշտը, մյուս կողմից էլ թշնամանքի բոլոր դրսևորումները ուղղվում են հայկական միջավայր՝ նախկիններ-ներկաներ, արցախցիներ-հայաստանցիներ» ։

Նրա արձանագրմամբ` այս իշխանությունն ամեն բան տապալել է, գիտակցում է, որ իրենց իշխանությունն ու անվտանգությունը փոխկապակցված են, այսինքն վտահ են, որ եթե իշխանությունից զրկվեն, ապա իրենց անձնական անվտանգությանը դա կարող է սպառնալիք լինել։ Մյուս կողմից էլ այս իշխանությունները իրենց անձնական անվտանգությունը իրենք տեսնում են թուրք -ադրբեջանական նախագծերի իրականացման ներքո և իրենք իրականում չեն սխալվում, քանի որ թուրքերի և ադրբեջանցիների համար այս իշխանությունները իրական շանս են վերջնականապես փակելու հայկական հարցը։

Կփակվի՞ հայկական հարցը շուտ թե ավելի ուշ, գործչի խոսքերով, պայմանավորված է հենց այսպես կոչված խաղաղության օրակարգով, որն իրականում խաղաղություն չէ։ «Այն, ինչ առաջարկում է այսօրվա իշխանությունը նույնն է, եթե զինվորին ասեն՝ հանձնվի գերի և դու կպրծնես ռումբերից, գերության մեջ կունենաս սնունդ, քեզ կապահովեն բուժօգնությամբ և քեզ չեն սպանի։ Սա է ըստ էության, քարզում ՀՀ իշխանությունները։ Պետություն- Ստամոքս կոնցեպտն իրենց համար իբր հավասար է Իրական Հայաստանին, որն էլ իր հերթին հավասար է արևմտյան Ադրբեջան կոնցեպտին», - եզրափակել է նա։

Աղբյուր` Փաստինֆո