Փաստ ինֆո

Ըստ օրենքի՝ մենք երկշաբաթյա ժամկետում պետք է համայնքի ղեկավար ընտրենք, չեմ բացառում, որ գուցե ևս մեկ նիստ նախաձեռնենք այդ օրակարգով։ Այս մասին այսօր լրագրողների հետ զրույցում ասաց Գյումրիի ավագանու «Քաղաքացիական պայմանագիր» խմբակցության ղեկավար Քնարիկ Հարությունյանը։

«Մենք նիստը հրավիրել ենք, որպեսզի որոշենք համայնքի ղեկավարի ընտրության հարցը։ Օրենքն ասում է, որ մենք նիստը պետք է հրավիրենք, հետո որոշենք համայնքի ղեկավարին, քանի որ մեր նպատակը որքան հնարավոր է շուտ արտահերթի գնալն է, մենք այս դեպքում՝ օրեր ենք կրճատել, որպեսզի այդ պրոցեսը արհեստականորեն չերկարաձգվի»,-ասաց Հարությունյանը։

Նա նշեց, որ քանի որ «Բալասանյան դաշինքը» ամենաշատ քվե ստացած դաշինքն է եղել՝ իրենք համարում են, որ այս ավագանին այլևս լեգիտիմ չէ, իր լիազորությունները իրականացնելու և լիգիտիմ չէր լինի, որպեսզի իրենք ավագանուց ընտրեին համայնքի ղեկավար։

Դիտարկմանը, թե ՔՊ-ին մեղադրում են «Բալասանյան դաշինքին» «ռեկետ» անելու մեջ, քանի որ քրեական գործերի ակտիվացմանը զուգահեռ «Բալասանյան դաշինքը» սկսեց վայր դնել մանդատները՝ նա պատասխանեց, որ «Բալասանյան» դաշինքին պետք է հարցնել, թե ինչու է նա այդպես վարվել։ «Որպես Գյումրիի բնակիչ՝ ինձ էլ հետաքրքիր է, թե ինչու է «Բալասանյան» դաշինքն այդպես վարվել, ինձ էլ հետաքրքիր է, թե ինչու իրենք այդպես էլ այս ամբողջ ընթացքում հանդես չեկան պաշտոնական հայտարարությամբ ու չբացատրեցին, թե ինչու են այդպես վարվել»։

Հարցին, թե ինչու հանկարծ հիշեցին Սև բերդի տարիներ առաջ գործարքի մասին, ընդ որում՝ հանկարծ ակտիվացան այդ խոսակցությունները, այն դեպքում՝ երբ վարչույթը վաղուց կար, բայց ակտիվացումներն ու ձերբակալությունները այս փուլում սկսվեցին՝ նա պատասխանեց, որ գործընթացը իրավական է։ «Քաղաքական ու իրավական պրոցեսները առհասարակ չպետք է խառնել իրար, դրանք տարանջատված են, տեղի է ունեցել իրավական պրոցես։ Ես իրավական պրոցեսը քաղաքականացնելու միտում չեմ տեսնում»։

Դիտարկմանը, թե իրավական պրոցեսներով ճնշել են՝ նա պատասխանեց. «Դա մեր աշխատելաոճը չէ»։

Հարությունյանին զարմեցրեց դիտարկումը, թե Ալավերդիում ու Վանաձորում էլ նույն իրավիճակը եղել ՝ նա նշեց, որ լրագրողի մեկնաբանությունն է, որ եղել են ճնշման դեպքեր։ «Ես ասում եմ, որ դրանք եղել են իրավական պրոցեսներ, որոնք ըստ օրենքի ու ընթացակարգի տեղի են ունեցել»։

Աղբյուր` Փաստինֆո