Փաստ ինֆո

Ֆրանսիայում հայրը փորձել է անտառում լքել վեցամյա որդուն, սակայն երեխան դիմադրել է՝ բռնվելով ընթացող ավտոմեքենայից, ինչի արդյունքում վնասվածք է ստացել։ Այս մասին հայտնում է L'Est Républicain-ը։

Միջադեպը տեղի է ունեցել հոկտեմբերի 31-ին երկրի հյուսիս-արևելքում գտնվող Մյուրտե և Մոզել դեպարտամենտում։ Պարբերականի տեղեկություններով՝ 44-ամյա տղամարդը գիշերով երեխային անտառ է տարել ու որոշել որպես պատիժ թողնել նրան այնտեղ։ Ենթադրվում է, որ դա հոր արձագանքն է եղել այն բանին, որ որդին ցերեկը ժամանցի կենտրոնում անհնազանդ է եղել:

Ծնողի կողմից անտառ «նետված» տղան կառչել է հոր՝ արդեն հեռացող մեքենայի բռնակից և ընկնելով՝ ստացել վնասվածքներ գլխի, դեմքի և ձեռքերի շրջանում։

Հայրը վերցրել է ցավային շոկի մեջ հայտնված որդուն ու գնացել մոտակա հիվանդանոցի շտապօգնության բաժանմունք։ Հարցաքննության ժամանակ հայրը հայտնել է, որ իր երեխան վնասվածք է ստացել «վթարի արդյունքում», մինչդեռ որդին պատմել է իրադարձությունների իր վարկածը։

Տղամարդը կասկածվում է երեխայի նկատմամբ դաժան վերաբերմունքի և դիտավորությամբ ծանր վնասվածքներ հասցնելու մեջ, մինչև դատավարությունը նրան կարգելեն շփվել որդու հետ։

Աղբյուր` Փաստինֆո