Փաստ ինֆո

Արմեն Աշոտյանի գործը հավակնում է դառնալ նորանկախ Հայաստանի պատմության մեջ քաղաքական ֆարսերից մեկը։ Երեկ Արդարադատության նորանշանակ նախարարն իր մուտքը այդ պաշտոնին ազդարարել է «անամոթ ստով»՝ ասելով, որ Հայաստանում քաղաքական բանտարկյալներ չկան։ Այս մասին լրագրողների հետ զրույցում ասաց նախկին պատգամավոր Նաիրա Զոհրաբյանը։

«Նույնիսկ եվրոպական ամենախոշոր կուսակցությունը՝ ԵԺԿ-ն, քանիցս իր բանաձևերում արձանագրել է ՀՀ-ում քաղաքական բանտարկյալների առկայությունը, անգամ Fredom House-ը բազմիցս հայտարարել է, որ ՀՀ-ում դատարաններն անկախ չեն և ախտահարված են, նույնիսկ այս իշխանության տերեր հանդիսացող միջազգային կառույցները չեն կարողացել այս իրավիճակը թաքցնել և արձանագրել են, որ ՀՀ-ում քաղաքական հետապնդումներն առկա են։ Անգամ այս իշխանության ոչ պաշտոնական խոսնակ հանդիսացող Հովիկ Աղազարյանը Քյրամայանի հետ դեբադում արձանագրել էր, որ կալանքը կիրառվում է որպես ճնշման գործիք, ցուցմունք կորզելու գործիք, իսկ Արդարադատության նախարարն ասում է, որ երկրում քաղաքական բանտարկյալներ չկան»։

Անդրադառնալով Սրբուհի Գալյանի մեկ այլ հայտարարությանը, թե կիսում է Նիկոլ Փաշինյանի վարած քաղաքականության պատասխանատվությունը՝ Զոհրաբյանը նշեց.«Բնականաբար, իրենք չեն կարող չկիսել Փաշինյանի վարած քաղաքականությունը, որովհետև, ինչպես ասել եմ, դա ոչ թե քաղաքական թիմ է, այլ Նիկոլ Փաշինյանի անվան «կուտոկ» է։ Մի «կուտոկում», որտեղ հավաքվածները մեղսակցված են իրար հետ դավաճանության թելով, պատասխան են տալու»։
Զոհրաբյանը պնդեց, որ եթե այս իշխանությունը մնա, ապա ՀՀ-ն չի լինելու։
Ինչ վերաբերում է օրհներգի փոփոխության մասին նախագծին, Զոհրաբյանը նշեց, որ չի բացառում, որ վաղը Նիկոլ Փաշինյանը նախագիծ ներկայացնի, ըստ որի, Արարատ անունով անձինք՝ սկսած Արարատ Միրզոյանից, իրենց անունը փոխեն և դառնան լավագույն դեպքում՝ Արագած, իսկ վատագույն դեպքում՝ Արաբաթ։

Աղբյուր` Փաստինֆո