Փաստ ինֆո

Մայր Աթոռի դիվանապետ Արշակ արքեպիսկոպոս Խաչատրյանը կայցելի տնային կալանքի տակ գտնվող ՀՀԿ փոխնախագահ Արմեն Աշոտյանին՝ որպես խոստովանահայր։ Հակակոռուպցիոն դատարանը՝ դատավոր Վահե Դոլմազյանի նախագահությամբ, բավարարեց պաշտպանների միջնորդությունը։

«Փաստինֆո»-ի թղթակցի հաղորդմամբ՝ այսօր կայացած դատական նիստում շարունակվել է գործով վկաների հարցաքննությունը։ Հաջորդիվ, Արմեն Աշոտյանի պաշտպան Ռուբեն Մելիքյանը միջնորդություն ներկայացրեց՝ խնդրելով թույլատրել Մայր Աթոռի դիվանապետ Արշակ արքեպիսկոպոս Խաչատրյանին՝ այցելելու Աշոտյանին։

Աշոտյանը նշեց, որ որպես հոգևոր խնամքի հոգևոր ներկայացուցիչ, որպես խոստովանահայր ընտրել է Արշակ սրբազանին, հավատքի թեմայով ցանկանում է իր հոգևոր պրակտիկաները շարունակել։ Հանրային մեղադրողն առարկեց միջնորդության դեմ՝ նշելով, թե դատարանը որոշումը կայացնելիս մանրամասն արձանագրել է, թե ում հետ կարող է Աշոտյանը շփվել, ինքը, լինելով որպես ՀԱԵ հավատացյալ, պնդեց, որ չկան քրեադատավարական կարգավորումներ, սա կարող է շարունակական բնույթ կրել և ամեն անգամ միջնորդություն ներկայացնեն ինչ-որ մեկի հետ հանդիպելու համար։

«ՀՀ Սահմանադրությունը, որը ոչ ոք դեռ չի փոխել, ասում է, որ մտքի, խղճի և կրոնի ազատությունը կարող է սահմանափակվել միայն օրենքով պետական անվտանգության, հասարակական կարգի, առողջության, կամ այլոց իրավունքների պահպանման նպատակով։ Ինձ հիմնավորեք, թե իմ հոգևոր հոր հետ հանդիպումն ինչպե՞ս կարող է խանգարել պետական անվտանգությանը, հասարակական կարգին կամ այլոց իրավունքների կատարմանը։ Զավեշտ է, որ առաջին քրիստոնյա երկրի դատարանում նման հարց ենք քննարկում, բայց երևի նախադեպ չի եղել։ Աշխարհը շուռ չի գա, որ մերժեք, բայց, վստահաբար, քրիստոնեական ընկալմանը Հայաստանում ևս մեկ հանրային հարված կհասցվի»,-ասաց Աշոտյանը։

Դատարանը, լսելով կողմերին, հիշեցրեց, որ դատարանն ավելի վաղ թույլատրել էր ԱԺ գործող պատգամավորներին, որոշ ազգականների տեսակցել Աշոտյանին։ Դատարանը որոշեց բավարարել միջնորդությունը։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես 2022 տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։ Արմեն Աշոտյանը 2023 թվականի հունիսից մինչև 2024թ․ սեպտեմբերի 11-ը կալանքի տակ է գտնվել։ Դատարանը Աշոտյանի նկատմամբ որպես խափանման միջոց է կիրառել տնային կալանքը և գրավը՝ 25 մլն դրամի չափով։

Հեղինակ՝ Իզաբել Սահակյան

Աղբյուր` Փաստինֆո