Փաստ ինֆո

Ես այդ բեռը նախկինում ստանձնած եղել եմ։ Այս մասին լրագրողների հետ զրույցում ասաց ՀՀ արդարադատության նախարար Սրբուհի Գալյանը՝ պատասխանելով դիտարկմանը, որ այդ դեպքում (նախարարի պաշտոնում նշանակվելը հեղ․) ՔՊ-ի ողջ պատասխանատվության բեռը, ողջ պատասխանատվությունն ու մեղքերը նաև իր վրա է տեղափոխվելու։

Մասնավորապես, Գալյանը, անդրադառնալով նախարարի պաշտոնում նշանակվելու առաջարկությանը, նշել էր, թե առաջարկը սպասելի չէր, քանի որ ինքն այլ պաշտոն էր զբաղեցնում, սակայն առաջարկը ստանալուց հետո մտածել և տվել է գիտակցված համաձայնությունը։ Ապա, արձագանքելով դիտարկմանը, որ այդ դեպքում ՔՊ-ի ողջ պատասխանատվության բեռը, այսպես ասած՝ «մեղքերն» ու պատասխանատվությունը իր վրա ևս տեղափոխվելու են, նշել էր, որ նախկինում արդեն այդ բեռը ստանձնած եղել է, երբ հեղափոխությունից հետո զբաղեցրել է արդարադատության նախարարի տեղակալի պաշտոնը։

Հարցին՝ արդյո՞ք մտահոգություն չունի, որ ՔՊ-ն մի օր էլ իր դեմ ստորագրահավաք կիրականացնի, Գալյանը պատասխանեց՝ կարծում է, որ գործադիրում գործը պետք է գործ անելը լինի, մտահոգություններ ունենալը տեղին չէ։
Գլխավոր դատախազի տեղակալի պաշտոնից օրերս ազատված և ԱՆ նախարար նշանակված Գալյանը նաև հայտնեց, որ խաղաղության պայմանագրի տեքստին դեռ չի հասցրել ծանոթանալ, բայց ստանձնել է պատասխանատվություն՝ ապահովելու խաղաղության ողջ գործընթացի իրավական ուղեկցումը։

«Ես ամբողջովին կիսում եմ իշխող քաղաքական ուժի դիրքորոշումն՝ իրական Հայաստանի գաղափարախոսության հետ կապված։ Ստանձնել եմ պատասխանատվություն՝ իրականացնելու իրավական ապահովումը ողջ գործընթացի»,- հայտարարել է նա։

Աղբյուր` Փաստինֆո